Ўзбекистон Mobiuz алоқа операторини $300 млнга сотишни режалаштирмоқда — Bloomberg
Нашр манбаларига кўра, агар Mobiuz бошқа операторлар билан бирлашса, давлат потенциал харидорни қўллаб-қувватлашга тайёр. Ҳозирда Қатар, Саудия Арабистони, Озарбайжон ва Европа инвесторлари Mobiuz’ни хусусийлаштиришга олдиндан қизиқиш билдирмоқда.
Ўзбекистон Mobiuz мобил алоқа операторини 300 млн долларга сотишни режалаштирмоқда. Bloomberg’нинг икки ишончли манбасига кўра, бу жараёнга Яқин Шарқ ва Европадан инвесторлар жалб қилиниши мумкин.
Universal Mobile Systems MChЖ, яъни Mobiuz, мамлакатдаги тўртинчи йирик оператор ҳисобланади.
Нашр манбаларига кўра, агар Mobiuz бошқа операторлар билан бирлашса, давлат потенциал харидорни қўллаб-қувватлашга тайёр.
Ҳозирда Қатар, Саудия Арабистони, Озарбайжон ва Европа инвесторлари Mobiuz’ни хусусийлаштиришга олдиндан қизиқиш билдирмоқда.
Bloomberg таъкидлашича, Давлат активларини бошқариш агентлиги вакили ушбу масала юзасидан изоҳ беришдан бош тортган.
Mobiuz’нинг 100 фоизлик улушини сотиш бўйича тендер июн ойида эълон қилинган бўлиб, ариза топшириш муддати 1 августга қадар белгиланган. Мазкур савдо бўйича халқаро молиявий ва стратегик маслаҳатчи сифатида Rothschild & Co жалб этилган.
Fitch Solutions’га қарашли BMI маълумотларига кўра, 2024 йил охирида Ўзбекистонда мобил алоқа фойдаланувчилари сони 35,6 миллионга етган бўлиб, улардан 20,9 фоизи Mobiuz абонентлари бўлган. Компаниянинг асосий рақобатчилари — давлатга қарашли Uztelecom, Coscom ҳамда Дубайда жойлашган Veon Ltd компаниясига тегишли Unitel MChЖ.
Давлат активларини бошқариш агентлиги маълумотига кўра, Mobiuz 2024 йилда 164 миллион доллар даромад ва 41 миллион доллар миқдорида EBITDA (яъни фоиз, солиқ, амортизация ва эскиришдан олдинги фойда) қайд этган.
Veon (Beeline) матбуот хизмати Mobiuz тендерида иштирок этиши ёки йўқлиги юзасидан аниқ изоҳ бермаган. Бироқ компания мунтазам равишда янги ўсиш имкониятларини кўриб чиқишини билдирган ва Ўзбекистонни ўзининг устувор бозорларидан бири деб атап, бу ерда рақамли хизматларини кенгайтиришга интилаётганини таъкидлаган.
Mobiuz ҳақида
Universal Mobile Systems – Mobiuz бренди остида GSM, UMTS ва 4G LTE технологияларида мобил алоқа ва мобил интернет хизматларини кўрсатади. 2024 йилда компаниянинг соф тушуми 2,086 триллион сўмни ташкил этган, абонентлар сони эса 7,8 миллион нафарга етган.
UMS дастлаб Ўзбекистон ҳукумати ва Россиянинг МТС компанияси ўртасидаги келишув асосида ташкил этилган. 2016 йилда МТС ўз улушини сотган. 2018 йилдан компания Рақамли ишонч жамғармасига тегишли бўлган. Жамғарма 2021 йилда тугатилгач, UMS компаниясининг эгалик ҳуқуқи Ахборот технологиялари ва коммуникацияларини ривожлантириш вазирлигига ўтган.
