Ўзбекистон кетма-кет олтинчи ой ҳам олтин экспортини амалга оширмади
Январь–март ойларида экспорт ҳажми 5,8 млрд доллар бўлиб, 2025 йилнинг мос даврига нисбатан 29,3 фоизга камайди. Бунга 2026 йилда олтин экспортининг тўлиқ тўхтагани сабаб бўлган. Шунга қарамай, олтинсиз экспорт ҳажми 26,2 фоизга ошди.
Ўзбекистон кетма-кет олтинчи ой ҳам олтин экспортини амалга оширмади. Бу ҳақда статистика қўмитаси эълон қилган ҳисоботда келтириб ўтилган.
2026 йил январь-март ойларида республиканинг ташқи савдо айланмаси (ТСА) 18 млрд долларга етди. Бу 2025 йилнинг мос даврига нисбатан 471,0 млн АҚШ долларига ёки 2,7 %га кўпроқдир.
Шу даврда импорт ҳажми сезиларли ошиб, 12,2 млрд долларни ташкил этган бўлса, экспорт 5,8 млрд долларгача қисқарди. Натижада ташқи савдо баланси 6,4 млрд долларлик манфий сальдо билан шаклланди.
Экспорт кўрсаткичларида эса пасайиш кузатилди. Январь–март ойларида экспорт ҳажми 5,8 млрд доллар бўлиб, 2025 йилнинг мос даврига нисбатан 29,3 фоизга камайди. Бироқ махсус экспорт ҳисобга олинмаганда, товарлар экспорти 3,48 млрд долларга етиб, ўтган йилга нисбатан 26,2 фоизга ошган. Бу олтин экспортидаги кескин ўзгариш умумий экспорт статистикасига кучли таъсир қилганини кўрсатади.
Ҳисоботга кўра, Ўзбекистон январь–март ойларида номонетар олтин экспортини амалга оширмаган. Таққослаш учун, 2025 йилнинг шу даврида номонетар олтин экспорти 3,57 млрд долларни ташкил этган ва жами экспортнинг 43,5 фоизига тенг бўлган. 2026 йилда эса ушбу кўрсаткич нолга тенглашган.
Шу тариқа, Ўзбекистон кетма-кет олтинчи ой ҳам олтин экспортини амалга оширмади. Аввалроқ мамлакат январь ва февраль ойларида ҳам олтин экспорт қилмагани қайд этилганди. Бундан олдин, октабр, ноябрь ва декабрь ойларида ҳам олтин экспорти кузатилмаган, аксинча олтин хариди амалга оширилган.
Олтин экспортисиз ҳам айрим йўналишларда ўсиш сақланиб қолди. Хусусан, хизматлар экспорти 2,3 млрд долларга етиб, ўтган йилга нисбатан 26,8 фоизга ошди. Тўқимачилик маҳсулотлари экспорти 739,9 млн долларни ташкил этиб, 17,6 фоизга кўпайди. Мева-сабзавот экспорти эса 317,7 млн долларга етиб, 12,4 фоизга ўсди.
