Ўзбекистон банкларида муаммоли кредитлар 25 трлн сўмга етди. Банклар кесимида кўрсаткичлар
2026 йилнинг тўққиз ойида Ўзбекистон банкларидаги муаммоли кредитлар ҳажми қарийб 7 трлн сўмга ёки 38,5 фоизга ошиб, 25 трлн сўмга етди.
2026 йил 1 октябрь ҳолатига тижорат банкларининг жами кредит портфели 659,1 трлн сўмни ташкил этди. Бу ҳақда Марказий банк маълумотларида келтириб ўтилган.
Банклар портфелининг 25 трлн сўми муаммоли кредитлар ҳисобланади. Тўққиз ойда NPL ҳажми қарийб 7 трлн сўм ёки 38,5 фоизга кўпайди. NPLнинг кредит портфелидаги улуши эса 3 фоиздан 3,8 фоизгача кўтарилди.
Давлат банклари
1 октябрь ҳолатига кўра, давлат банкларининг кредит портфели 425 трлн 820 млрд сўмни ташкил этмоқда.
Уларнинг таркибидаги муаммоли кредитлар йил бошига нисбатан 4,11 трлн сўм ёки 32 фоизга кўпайиб, 16,94 трлн сўмга етди. Бу тизимдаги жами NPLнинг 67,7 фоизига тенг.
Ушбу банкларнинг кредит портфели эса 5,3 фоизга ўсиб, 425,82 трлн сўмни ташкил этди. Портфелдаги муаммоли кредитлар улуши 3,17 фоиздан 3,98 фоизгача ошди.
Хусусий ва бошқа банклар
Хусусий ва бошқа банкларда NPL ҳажми 2,88 трлн сўм ёки 55,1 фоизга кўпайиб, 8,10 трлн сўмга етган. Мазкур гуруҳнинг кредит портфели 16,9 фоизга кенгайиб, 233,27 трлн сўмни ташкил этган. Муаммоли кредитлар улуши эса 2,62 фоиздан 3,47 фоизгача кўтарилган.
Энг катта ўсиш Микрокредитбанкда
Тўққиз ойда муаммоли кредитлар ҳажми энг кўп Микрокредитбанкда ошган. Банкдаги NPL йил бошидаги 894 млрд сўмдан 2,74 трлн сўмга етди. Ўсиш 1,85 трлн сўм ёки 206,4 фоизни ташкил этди.
Биргина ушбу банк ҳиссасига тизимдаги муаммоли кредитлар соф ўсишининг 26,4 фоизи тўғри келган. Микрокредитбанкнинг кредит портфелидаги NPL улуши эса 4,41 фоиздан 11,39 фоизгача кўтарилган.
Кейинги ўринларда Анорбанк, Халқ банки ва Ориент Финанс банк жойлашган.
| Банк | 1 октябрдаги NPL ҳажми | Йил бошидан ўсиш |
|---|---|---|
| Микрокредитбанк | 2,74 трлн сўм | 1,85 трлн сўм |
| Анорбанк | 1,18 трлн сўм | 701,4 млрд сўм |
| Халқ банки | 1,59 трлн сўм | 560,2 млрд сўм |
| Ориент Финанс банк | 568,6 млрд сўм | 547,6 млрд сўм |
| Агробанк | 3,18 трлн сўм | 481,6 млрд сўм |
| TBC Bank | 1,04 трлн сўм | 444,9 млрд сўм |
| Бизнесни ривожлантириш банки | 1,53 трлн сўм | 422,1 млрд сўм |
| Алоқабанк | 809,6 млрд сўм | 332,3 млрд сўм |
| Ҳамкорбанк | 483,1 млрд сўм | 290,7 млрд сўм |
| Мадад Инвест банк | 254,8 млрд сўм | 252,2 млрд сўм |
Биринчи ярим йилликда ҳам NPL ҳажми энг кўп Микрокредитбанкда кўпайган эди. Ўшанда банкдаги муаммоли кредитлар 1,80 трлн сўмни ташкил этган. Учинчи чоракда кўрсаткич яна қарийб 943 млрд сўмга ошган.
Сентябрда NPL яна 1 трлн сўмга кўпайди
Бир ой ичида банк тизимидаги муаммоли кредитлар 1,02 трлн сўмга ошди. Шундан 396,4 млрд сўми давлат банклари, 621,6 млрд сўми бошқа банклар ҳиссасига тўғри келган.
Сентябрдаги энг катта ўсиш ҳам Микрокредитбанкда кузатилган — 601,3 млрд сўм. Ориент Финанс банкда NPL 311,7 млрд сўмга, Мадад Инвест банкда 196,3 млрд сўмга ва Ипотека-банкда 127,1 млрд сўмга кўпайган.
Айни пайтда айрим йирик банкларда пасайиш қайд этилган. Жумладан, Асакабанкдаги муаммоли кредитлар 97,4 млрд сўмга, Ўзмиллийбанкда 65,2 млрд сўмга, Ziraat Bank Uzbekistan’да 65,1 млрд сўмга ва Алоқабанкда 45,8 млрд сўмга камайган.
Муаммоли кредитлар улуши энг юқори банк — Мадад Инвест банк
1 октябрь ҳолатига кредит портфелидаги NPL улуши бўйича энг юқори кўрсаткич Мадад Инвест банкда қайд этилган — 43,42 фоиз. Банкнинг 586,8 млрд сўмлик кредит портфелидан 254,8 млрд сўми муаммоли кредитлардан иборат.
Бир ой аввал бу улуш 10,04 фоиз эди. Сентябрь давомида NPL ҳажми 58,5 млрд сўмдан 254,8 млрд сўмга, яъни 4,4 баробарга ошган.
| Банк | NPL ҳажми | Кредит портфелидаги улуши |
|---|---|---|
| Мадад Инвест банк | 254,8 млрд сўм | 43,42% |
| Пойтахт банк | 103,4 млрд сўм | 13,79% |
| TBC Bank | 1,04 трлн сўм | 13,40% |
| Микрокредитбанк | 2,74 трлн сўм | 11,39% |
| Анорбанк | 1,18 трлн сўм | 9,03% |
| AVO bank | 111 млрд сўм | 6,90% |
| Гарант банк | 103,5 млрд сўм | 6,07% |
| Бизнесни ривожлантириш банки | 1,53 трлн сўм | 5,78% |
Мадад Инвест банкда бундай кескин ўзгариш йил давомида аввал ҳам кузатилган. Pinkod апрель ойида ёзган материалда банкдаги NPL улуши 50,8 фоизга етгани қайд этилган эди.
Мутлақ ҳажм бўйича Агробанк етакчи
Муаммоли кредитларнинг суммаси бўйича биринчи ўринда Агробанк турибди — 3,18 трлн сўм. Ўзмиллийбанкда бу кўрсаткич 3,11 трлн сўм, Микрокредитбанкда эса 2,74 трлн сўмни ташкил этган. Лекин бу банкларда жами кредит портфели анча йирик эканлиги туфайли NPL улуши анча паст шаклланган.
| Банк | NPL ҳажми | Кредит портфелидаги улуши |
|---|---|---|
| Агробанк | 3,18 трлн сўм | 3,32% |
| Ўзмиллийбанк | 3,11 трлн сўм | 2,99% |
| Микрокредитбанк | 2,74 трлн сўм | 11,39% |
| Ўзсаноатқурилишбанк | 1,79 трлн сўм | 3,02% |
| Асакабанк | 1,61 трлн сўм | 4,09% |
| Халқ банки | 1,59 трлн сўм | 4,14% |
| Бизнесни ривожлантириш банки | 1,53 трлн сўм | 5,78% |
| Ипотека-банк | 1,24 трлн сўм | 3,31% |
| Анорбанк | 1,18 трлн сўм | 9,03% |
| Капиталбанк | 1,11 трлн сўм | 2,79% |
Қайси банкларда NPL камайган?
Йил бошига нисбатан муаммоли кредитлар ҳажми Ziraat Bank Uzbekistan’да 23,8 млрд сўмга, Ипотека-банкда 18,1 млрд сўмга қисқарган. Давр банкда камайиш 28,4 млн сўм, Содерот банкда эса 333,3 млн сўмни ташкил этган.
KDB Bank Ўзбекистон ва Октобанкда 1 октябрь ҳолатига муаммоли кредитлар қайд этилмаган. Узум банкда NPL улуши 0,03 фоиз, Апекс банкда 0,08 фоиз ва Openbank’да 0,42 фоизга тенг бўлган.
