Ўзбекистон 2025 йил бошидан бери энг кўп олтин сотган давлат бўлиб турибди
Ўзбекистон жорий йилнинг дастлабки беш ойи якунларига кўра, олтин экспорти бўйича дунёда етакчи бўлди. Жумладан, мамлакат олтин захиралари бу даврда 27 тоннага камайган.
Ўзбекистон 2025 йилнинг 5 ойи (январь-май) якунида олтин сотуви бўйича дунёда етакчи бўлди. Мамлакат кетма-кет уч ой давомида (февраль-апрель) олтин экспорти бўйича пешқадам бўлган эди.
Жаҳон олтин кенгаши маълумотларига кўра, 2025 йил май ойида Сингапур Пул-кредит бошқармаси 5 тонна олтин сотуви билан биринчи ўринни эгаллаган. Ўзбекистон ва Германия Марказий банклари эса ҳар бири 1 тоннадан олтин сотиб, иккинчи ўринни бўлишган.
Шунга қарамай, йиллик кўрсаткичлар бўйича Ўзбекистон 27 тонна соф олтин сотуви билан энг йирик экспортчи давлат бўлиб қолмоқда.
Қозоғистон Марказий банки эса май ойида ўз захираларини 7 тоннага ошириб, жами 299 тоннага етказди. Йил бошидан буён мамлакат захиралари 15 тоннага кўпайган.
Ўзбекистон Жаҳон олтин кенгашининг сўнгги учта ҳисоботида олтин экспорти бўйича етакчи мамлакат сифатида қайд этилган эди. Хусусан, февраль ойида 12 тонна олтин сотиб, Қозоғистондан (8 тонна) ўзиб кетган ва жаҳонда энг йирик экспортчи бўлган. Март ойида эса 11 тонна олтин экспорт қилиниб, бу позиция сақлаб қолинган.
Апрель ойида экспорт қилинган олтиннинг қиймати 1,91 миллиард долларга тенг бўлган. Бу ойда ҳам мамлакат 11 тонна олтин экспорт қилган.
