OpenAI Sora видео яратиш платформасини ишга тушганидан кўп ўтмай ёпмоқда
OpenAI ўтган йили катта шов-шув билан тақдим этган Sora видео платформасини кутилмаганда ёпишини эълон қилди. Шу билан бирга, Disney билан режалаштирилган 1 млрд долларлик келишув ҳам бекор қилинди, бу эса OpenAI’нинг видео AI йўналишидаги стратегияси ўзгараётганини кўрсатмоқда.
OpenAI ўтган йили ишга туширган генератив сунъий интеллект асосидаги видео яратиш иловаси — Sora’ни ёпишини расман эълон қилди. Компания қарор сабабларини очиқламади, бироқ бу янгилик AI видео бозорида катта резонанс уйғотди.
Sora жамоаси сешанба куни эълон қилган баёнотида фойдаланувчиларга миннатдорчилик билдириб, шундай деди: “Sora билан хайрлашяпмиз. Sora орқали контент яратган, уни улашган ва атрофида ҳамжамият шакллантирган барчага раҳмат. Сиз яратган ишлар муҳим эди ва бу янгилик кўпчиликни ранжитишини биламиз.”
Шунингдек, OpenAI яқин орада қўшимча маълумотлар — илова ва API учун аниқ муддатлар, шунингдек фойдаланувчи ишланмаларини сақлаб қолиш бўйича тафсилотларни эълон қилишини маълум қилди. Айни пайтда компания қўшимча изоҳ беришдан тийилган.
Disney билан миллиард долларлик ҳамкорлик бекор бўлди
Сораънинг ёпилиши атиги уч ой аввал Disney билан тузилган йирик келишув фонида содир бўлди. Уч йиллик лицензия битимига кўра, Sora Disney, Marvel, Pixar ва Star Wars оламига оид 200 дан ортиқ қаҳрамонлар асосида фойдаланувчи сўровларига мос видеолар яратиши керак эди.
Режага кўра, ChatGPT Images билан биргаликда 2026 йил бошида “fan-inspired” видеолар ишлаб чиқарилиши, Disney+ эса уларнинг сараланган қисмини платформага жойлаштириши кўзда тутилган эди.
Бироқ эндиликда Disney OpenAI билан ҳамкорликни тўхтатди. Бу ҳамкорлик доирасида медиа гигант OpenAI’га 1 миллиард доллар инвестиция киритиши ҳам режалаштирилган эди. Компанияни Сем Альтман бошқаради.
Disney вакили Variety нашрига берган изоҳида OpenAI қарорини ҳурмат қилишини билдириб, AI соҳасидаги ҳамкорлик бошқа шаклларда давом этишини таъкидлади.
Sora’нинг ёпилиши билан бирга ChatGPT ҳам матндан видео яратиш функциясини йўқотади. Бу эса OpenAI’нинг видео генерация йўналишидан вақтинча ёки тўлиқ чиқаётганини англатиши мумкин.
Эслатиб ўтамиз, Sora илк бор 2024 йил февралида тақдим этилган, декабрь ойида оммага чиқарилган ва 2025 йил сентябрда алоҳида илова сифатида ишга туширилган эди.
