Олтин нархи тарихда илк бор 5 300 долларга етди

28 январь куни жаҳон бозорларида олтин нархи тарихда илк маротаба 5 300 доллар чегарасидан юқорига кўтарилди. Бугуннинг ўзида олтин нархи қисқа вақтда 5 200 ва 5 300 долларлик психологик чегараларни босиб ўтди.

АҚШ долларига бўлган ишончнинг сусайиши ҳамда АҚШ Федерал захира тизими мустақиллиги борасидаги хавотирлар инвесторларни хавфсиз актив олтинга йўналтирмоқда.

Спот олтин нархи Ўзбекистон вақти билан 16:42 ҳолатига кўра, бир унция учун 5 260,3 долларни ташкил этмоқда. Кун давомида нарх рекорд даражадаги 5 312,31 долларгача етди. 

Аввалроқ Goldman Sachs банки 2026 йил охирига бориб олтин нархи 5 400 долларга етишини прогноз қилган эди. Бироқ йилнинг илк ойи якунланмасидан туриб олтин нархи деярли ушбу прогноз даражасига етиб келди. Бу ҳолат молиявий бозорларда прогнозлар доимо тахминий характерга эга эканини яна бир бор тасдиқламоқда.

XS.com компаниясининг катта бозор таҳлилчиси Линҳ Траннинг таъкидлашича, олтин нархининг ўсиши фақат бозорларидаги хавотирлар билан боғлиқ эмас.

“Инвесторлар глобал пул-кредит ва фискал тизимга нисбатан эҳтиёткор позицияга ўтаётгани ҳам олтин талабини оширмоқда”, — дейди у.

Айни пайтда молиявий институтлар, жумладан Deutsche Bank ва Bank of America таҳлилчиларига кўра, агар ҳозирги бозор шароитлари сақланиб қолса, 2026 йил охирига келиб олтин нархи бир унция учун 6 минг долларгача етиши мумкин.

Аввалроқ Ўзбекистонда олтин қуймалари нархи кетма-кет еттинчи кун ҳам рекорд даражани янгилагани хабар қилинган эди. 

Хусусан, 5 граммлик олтин қуймаси нархи илк бор қарийб 10,3 миллион сўмга етди. Жаҳон бозорларидаги ўсиш суръатлари сақланиб қолса, пайшанба куни ҳам қуймалар нархи яна бир рекордни янгилаши мумкин.