Олег Анашев Tenge Bank бошқаруви раиси ўринбосари лавозимидан кетди

Tenge Bank кузатув кенгаши Олег Анашевнинг бошқарув раиси ўринбосари сифатидаги ваколатларини тугатди. Қарор 18 август куни қабул қилинган, бироқ банк унинг лавозимдан кетиш сабабларини очиқламаган.

Корпоратив маълумотлар ягона порталида эълон қилинган муҳим фактга кўра, ўзгаришдан кейин Tenge Bank ижроия органи тўрт кишидан иборат бўлиб қолди.

Банк бошқарувига Бейбит Фалеев раислик қилмоқда. Унинг таркибида, шунингдек, бошқарув раиси ўринбосарлари Баян Имашева ва Дониёр Абдурахманов ҳамда бошқарувчи директор Мадина Юсупова фаолият юритмоқда.

Tenge Bank’нинг расмий сайтида Анашев 2026 йил 8 майдан бошқарув раиси ўринбосари этиб тайинлангани кўрсатилган. Шундан келиб чиқилса, у ушбу лавозимда уч ойдан сал кўпроқ ишлаган.

Анашев банк тизимида 2000 йилдан буён фаолият юритади. У аввал Қозоғистондаги ABN AMRO Asset Management ва ABN AMRO Bank Kazakhstan тузилмаларида, кейинчалик Halyk Bank тизимида турли лавозимларда ишлаган. 2020 йил августида Tenge Bank кузатув кенгашининг мустақил аъзоси этиб сайланган.

Tenge Bank Қозоғистоннинг Halyk Bank’ига тўлиқ тегишли шўба банк ҳисобланади. Банк Ўзбекистонда 2019 йилдан буён фаолият юритмоқда.