Nvidia Женсен Хуангни бош директор лавозимидан четлатишга тайёрланмоқда — WSJ
Американинг Nvidia компанияси директорлар кенгаши асосчи ва бош директор Женсен Хуангни лавозимидан озод этиш масаласини кўриб чиқмоқда.
Бунга унинг Хитой разведкасига алоқадорликда гумон қилинаётган аёл ва компаниянинг ўз раҳбарларидан бири билан никоҳдан ташқари муносабатлари ҳақидаги хабарлар сабаб бўлган.
Можаро фонида Nvidia акциялари биржадан кейинги савдоларда қарийб 8 фоизга арзонлашди.
The Wall Street Journal (WSJ) нашрининг 11 ноябрь куни вазиятдан хабардор манбаларга таяниб хабар беришича, Nvidia директорлар кенгаши Женсен Хуангни бош директор лавозимидан четлатишга тайёрланмоқда. Кенгаш унинг компаниядаги келажагини муҳокама қилиш учун йиғилиш ўтказишни режалаштирган.
Reuters ҳам ўз манбасига таяниб, директорлар кенгаши Хуангни лавозимидан озод қилиш масаласини кўриб чиқаётганини хабар қилди. Бироқ агентлик WSJ хабаридаги барча тафсилотларни мустақил тасдиқлай олмаганини билдирган.
Женсен Хуанг 1993 йилда Nvidia компаниясига асос солган ва ўшандан буён унга раҳбарлик қилиб келмоқда. Унинг бошқаруви даврида компания график процессорлар ишлаб чиқарувчисидан сунъий интеллект саноатининг асосий технологик таъминотчиларидан бирига айланди.
Директорлар кенгашининг эҳтимолий қарори технология саноатидаги энг йирик раҳбарлик ўзгаришларидан бири бўлиши мумкин. Чунки Nvidia нафақат сунъий интеллект учун зарур чипларни етказиб беради, балки дунёдаги энг қиммат компаниялардан бири ҳисобланади.
Можаро қандай бошланган?
Можаро октябрь охирида The New York Times томонидан эълон қилинган суриштирувдан кейин бошланган. Нашр маълумотларига кўра, АҚШ разведка идоралари Хуангнинг Хитой фуқароси Элис Хуанг билан яқин муносабатда бўлганини аниқлаган. Америка расмийлари аёлни Хитой разведкаси учун маълумот йиғишда гумон қилмоқда.
Элис Хуанг Сингапурда жойлашган Megaspeed компанияси раҳбарларидан бири ҳисобланади. Компания маълумотлар марказлари учун Nvidia процессорларини харид қилади. Нашрга кўра, Megaspeed сўнгги икки йил давомида Nvidia’дан 4,8 млрд доллардан ортиқ қийматдаги чиплар сотиб олган.
АҚШ расмийларини айнан шу тижорий алоқалар хавотирга солмоқда. Чунки Вашингтон Хитойнинг илғор сунъий интеллект процессорларига киришини чеклаган. Megaspeed эса Америка экспорт чекловларини четлаб ўтган ҳолда Хитой компанияларига чиплар етказиб берганликда гумон қилинмоқда.
Хуанг муносабатларини тан олди, Nvidia текширув бошлади
8 ноябрь куни Женсен Хуанг Nvidia ходимларига йўллаган мактубида турмуш ўртоғига хиёнат қилганини тан олди ва оиласидан, ҳамкасбларидан ҳамда компания акциядорларидан узр сўради.
У шахсий хатти-ҳаракатлари учун масъулиятни ўз зиммасига олишини, директорлар кенгаши бошлаган мустақил текширувда ҳамкорлик қилишини билдирди. Бироқ мактубда Элис Хуангнинг исми ёки у билан муносабатларнинг тафсилотлари келтирилмаган.
Ўша куни Nvidia директорлар кенгаши хорижий разведка фаолияти эҳтимоли юзасидан мустақил текширув бошлаганини маълум қилди. Кенгаш ҳозирча АҚШ миллий хавфсизлиги ёки компаниянинг тижорат сирларига зарар етказилган деб ҳисоблаш учун асос йўқлигини таъкидлади.
10 ноябрь куни текширувга АҚШнинг собиқ федерал прокурори Жун Ҳ. Ким ва Wachtell, Lipton, Rosen & Katz юридик фирмаси жалб этилди.
Иккинчи муносабат ҳақидаги хабар вазиятни кескинлаштирди
11 ноябрь куни The New York Times Хуангнинг Nvidia соғлиқни сақлаш йўналиши вице-президенти Кимберли Пауэлл билан ҳам никоҳдан ташқари муносабатда бўлганини хабар қилди.
Нашр компаниянинг беш нафар ходимига таяниб, Пауэлл бевосита Хуангга бўйсунувчи раҳбарлардан бири эканини ёзди. Хуанг ва Пауэлл бу хабарни омма олдида тасдиқламаган.
Reuters қайд этишича, мазкур маълумотлар ортидан директорлар кенгаши Хуангнинг компаниядаги келажагини муҳокама қилишга киришган.
Шу тариқа, 8 ноябрь куни Хуанг раҳбариятига ишонч билдирган директорлар кенгаши орадан уч кун ўтиб унинг лавозимдан кетиши мумкинлигини муҳокама қиладиган вазиятга келиб қолди.
Nvidia акциялари кескин арзонлашди
WSJ хабаридан кейин Nvidia акциялари 11 ноябрдаги асосий савдо сессияси тугагач, қўшимча савдоларда 8 фоиздан кўпроққа пасайди.
Reuters ҳисоб-китобига кўра, 8 ноябрда компания ички текширув бошланганини эълон қилганидан кейинги пасайишлар сақланиб қолса, Nvidia бозор қийматидаги жами йўқотиш қарийб 600 млрд долларга етиши мумкин.
Можаро бошқа технологик компаниялар акцияларига ҳам таъсир кўрсатди. Хусусан, Nvidia чипларидан фойдаланадиган CoreWeave акциялари қўшимча савдоларда 6 фоизга арзонлашди. Рақобатчилар AMD ва Broadcom акциялари эса мос равишда 4 ва 3 фоизга қимматлашди.
Инвесторларнинг асосий хавотири Хуанг кетган тақдирда Nvidia бошқарувини ким ва қандай давом эттириши билан боғлиқ.
12 ноябрь эрталабки ҳолатга кўра, Nvidia Женсен Хуангнинг лавозимидан озод этилгани ёки истеъфога чиққанини расман эълон қилмаган. Директорлар кенгашининг якуний қарори ҳам оммага маълум қилинмаган.
