Ноябрь ойида автомобиль бозорида савдолар ҳажми 6 фоизга ўсди

Ноябрь ойида автотранспорт воситаларининг барча тоифалари бўйича жами савдолар ҳажми 101,1 минг донани ташкил этди. Бу кўрсаткич ўтган йилнинг шу даврига нисбатан 6 фоизга юқори. Бу ҳақда Иқтисодий тадқиқотлар ва ислоҳотлар маркази таҳлилида маълум қилинган.

Ҳудудлар кесимида енгил автомобиллар савдоси ўсиш суръатлари бўйича Тошкент шаҳри (+33,7 фоиз) ва Қорақалпоғистон Республикаси (+8 фоиз) етакчи бўлди.

Бирламчи автомобиль бозорида ноябрь ойида енгил автомобиллар савдоси йиллик ҳисобда 15 фоизга ошди. Натижада, ўтган йилнинг шу даврига нисбатан қарийб 4,4 мингта автомобиль кўпроқ сотилди.

Маҳаллий ишлаб чиқарилган янги енгил автомобиллар сегментида реализация ҳажми тахминан 30 минг донани ташкил этиб, йиллик ҳисобда 13,6 фоизга ўсди. Хорижда ишлаб чиқарилган янги енгил автомобиллар савдоси эса қарийб 5 минг донага етди ва ўтган йил ноябрига нисбатан 22,5 фоизга юқори кўрсаткич қайд этилди.

Иккиламчи автомобиль бозорида эса ноябрь ойида тахминан 52 мингта фойдаланилган енгил автомобиль сотилди. Бу ўтган йилнинг шу даврига нисбатан 8 фоизга кам.

Шу билан бирга, пойтахтда фойдаланилган автомобиллар савдоси сезиларли даражада фаоллашди: реализация ҳажми 1,4 баробарга ошиб, ўтган йил ноябрига нисбатан 3,4 мингта автомобилга кўпайди.

Бундан ташқари, иккиламчи бозорда электромобиллар савдоси йиллик ҳисобда 1,8 баробарга ошди.