НКМК олтин нархи ўсиши фонида Лондон ва Тошкентда IPO ўтказишни режалаштирмоқда
Давлат корхонаси Citigroup, Morgan Stanley ва JPMorgan билан ҳамкорлик қилмоқда.
Қарздорликни ҳам ҳисобга олган ҳолда компания 20 миллиард долларлик баҳолашни мақсад қилган.
Навоий конь-металлургия комбинати (НКМК) Ўзбекистон ва Буюк Британияда иккита IPO ўтказишга тайёргарлик кўрмоқда. Бу ҳақда Bloomberg ҳолат билан таниш аноним манбаларга таяниб хабар берди.
Нашр маълумотига кўра, НКМК Лондон ва Тошкентда бўлиши мумкин бўлган акцияларни бирламчи оммавий жойлаштириш (IPO) учун банкларни танлади ва жаҳон бозорида олтин нархининг ўсишидан фойдаланишни мақсад қилган.
Давлат корхонаси қарзларни ҳам ҳисобга олган ҳолда тахминан 20 миллиард долларлик баҳолашга эришишни кутмоқда.
Бунга жорий йилда олтин нархининг қарийб 30% га ошиши ва бошқа олтин қазиб олувчи компанияларининг бозор мультипликаторлари ёрдам бермоқда. Масалан, Newmont Corp. ва Barrick Mining Corp. каби олтин ишлаб чиқарувчи компаниялар акциялари қимматбаҳо металл нархининг ошиши фонида анча қимматлашди.
Bloomberg ёзишича, НКМК Citigroup Inc., Морган Stanley ва JPMorgan Chase & Co. билан эҳтимолий жойлаштиришни ташкил этиш учун ҳамкорлик қилмоқда. Бунгача Citi ва JPMorgan давлат компаниясига Лондон фонд биржасида эвробондларни жойлаштиришда ёрдам берган. IPO бўйича маслаҳатчи — Rothschild & Co.
НКМК, шунингдек, Буюк Британия ва Ўзбекистонда икки томонлама листинг доирасида Лондонда савдога чиқариладиган глобал депозитарий квитанцияларини (GDR) чиқариш имкониятини ҳам кўриб чиқмоқда. Бироқ Bloomberg огоҳлантиришича, якуний қарорлар ҳали қабул қилинмаган, шунинг учун режалар ўзгариши мумкин.
