MobiUz компаниясини сотиб олиш учун уч нафар талабгор рақобатлашмоқда

Давлат активларини бошқариш агентлиги MobiUz (Universal Mobile Systems) компаниясини хусусийлаштириш жараёни доирасида мажбуриятли таклифлар босқичининг навбатдаги натижалари эълон қилинди.

Дастлаб мажбуриятсиз таклифлар босқичида 10 нафар талабгор саралаб олинган бўлиб, кейинги босқичда уларнинг 7 нафари мажбуриятли таклифлар бериш ҳуқуқига эга бўлди. Ушбу босқич якунларига кўра, энг юқори харид қиймати ва битимнинг муҳим шартлари бўйича энг рақобатбардош таклифларни билдирган 3 нафар талабгор аниқланди.

Мажбуриятли таклифлар босқичида иштирокчиларга компаниянинг молиявий, солиқ ва юридик фаолиятига оид кенг қамровли таҳлилий маълумотлар жойлаштирилган виртуал маълумотлар хонасидан фойдаланиш имконияти яратилди. Шунингдек, улар МобиУзънинг операцион фаолияти билан яқиндан танишиш, компания раҳбарияти билан учрашиш ҳамда қизиқтирган масалаларни муҳокама қилиш ҳуқуқига эга бўлди.

Бундан ташқари, талабгорлар компанияни сотиб олиш ва унинг келгусидаги фаолияти бўйича асосий шартларни белгиловчи битимни имзолади.

Аниқланган уч нафар талабгорга ўз таклифларини янада такомиллаштириш учун 2026-йил 23-январ куни соат 23:59 га қадар қўшимча муддат берилди.

9 июн куни Давлат активларини бошқариш агентлиги Universal Mobile Systems (Mobiuz) компанияси устав капиталидаги 100 фоиз давлат улушини хусусийлаштириш жараёнини бошлаганини маълум қилди.

Маълумотларга кўра, Ўзбекистон Mobiuz мобил алоқа операторини 300 млн долларга сотишни режалаштирмоқда. Bloomberg манбаларининг маълум қилишича, жараёнга Яқин Шарқ ва Европадан инвесторлар жалб қилиниши мумкин.

Шунингдек, агар Mobiuz бошқа операторлар билан бирлашиш эҳтимоли юзага келса, давлат потенциал харидорни қўллаб-қувватлашга тайёрлигини билдирган.