Миллий инвестиция жамғармасининг Лондондаги IPO’си 2026 йилда ўтказилиши кутилмоқда — Bloomberg

Ўзбекистон ўзининг Миллий инвестиция фонди (УзНИФ) акцияларини Лондонда оммавий жойлаштириш жараёнини жадаллаштирмоқда. Bloomberg манбаларига кўра, бу мамлакат тарихида Лондон фонд биржасидаги биринчи листинг бўлиб, кейинги давлат компаниялари учун йўл очиши мумкин.

UzNIF Лондон ва Тошкент бозорларида акцияларини сотиш учун ҳужжатларни тайёрламоқда. Жараён 2026 йилнинг биринчи чорагида бошланиши кутилмоқда.

Шу билан бирга, дунёдаги энг йирик олтин ишлаб чиқарувчилардан бири бўлган Навоий конь-металлургия комбинатининг IPOси бўйича ишлар секинлашган. Мавзу оммавий муҳокама қилинмаётгани сабабли исмини ошкор қилмаган манбалар НКМКнинг йил охиригача Лондонда IPO бошлаши энди даргумонлигини айтган.

IPOлар Ўзбекистоннинг хорижий капитални жалб қилишга қаратилган хусусийлаштириш дастурининг марказий қисмидир. Апрель ойидаги қарорда яқин икки йилда листингга чиқарилиши режаланган бир нечта йирик корхоналар кўрсатилган. Шунингдек, Uzum ва Centrum каби хусусий компаниялар ҳам оммавий жойлаштириш имкониятларини кўриб чиқмоқда. Лондондаги илк IPO бошқа номзодлар учун мезон вазифасини бажаради.

Ҳукумат жозибадорликни ошириш мақсадида фонд портфелини қайта шакллантиришда давом этмоқда. Сентябрь ойида “Ўзбекистон почтаси”, “Узбекистан Airports”, БРБ ва Микрокредитбанкдаги улушлар қайтарилгач, UzNIF портфели 18 та компаниядан 15 тасига қисқарди. 

Эвазига фонд айрим активларнинг қўшимча акцияларини ва “Ўзсаноатқурилишбанк”даги 30 фоизлик улушни қабул қилди. Бу ўзгаришлар фонд бошқарувидаги активлар ҳажмини 1,93 млрд долларга етказган.

Фитчънинг базавий сценарийсига кўра, SQB’даги назорат пакети сотуви UzNIF’нинг 2026 йилда режалаштирилган IPO’сидан кейин амалга ошиши мумкин. Жорий йил сентябрь ойида SQB’нинг 30 фоизлик улуши жамғарма таркибига ўтказилган эди. 

НКМК: дивиденд хавотири фонида кечикиш

Айни пайтда Навоий кон металлургия комбинатининг IPO’си кечикиши айтилмоқда. Ҳукумат ушбу битим олтин қазиб олувчи компаниянинг давлат бюджетига тўлайдиган салмоқли дивидендларини камайтириши мумкинлигидан хавотирда, дея ёзган Bloomberg.

Компания Ўзбекистон учун стратегик аҳамиятга эга, чунки олтин сотуви мамлакат экспортининг асосий қисмини ташкил этади ва металл халқаро захираларнинг тахминан 80 фоизини таъминлайди. Олтин нархининг ошиши фонида компания 2025 йилнинг биринчи ярмида ўз фойдасини деярли икки баравар ошириб, 1,5 миллиард долларга етказди. У 2024 йилда 1,7 миллиард доллар дивиденд эълон қилди, бу эса мамлакат йиллик даромадининг тахминан 7,5 фоизини ташкил этади.

Аввалроқ Pinkod НКМК Ўзбекистон ва Буюк Британияда иккита IPO ўтказишга тайёргарлик кўраётгани ҳақида ёзган эди. 

Давлат корхонаси қарзларни ҳам ҳисобга олган ҳолда тахминан 20 миллиард долларлик баҳолашга эришишни кутмоқда.