Микроқарзлар бўйича ўртача фоиз ставка илк бор 33 фоиздан пастга тушди
Марказий банк маълумотларига кўра, микроқарзлар бўйича ўртача фоиз ставкаси 27 октябрь ҳолатида илк бор 33 фоиздан пастлаб, 32,9 фоизни ташкил этди. Бу кузатувлар бошланганидан бери энг паст кўрсаткич ҳисобланади.
Марказий банк анъанавий тарзда тижорат банклари кесимида микроқарзлар ва автокредитларнинг ўрта ҳисобдаги фоиз ставкаларини эълон қилди. Унга кўра, микроқарзлар бўйича ставкалар статистик кузатувлар бошланганидан бери илк марта 33 фоиздан паст даражага тушган.
2025 йил 27 октябрь ҳолатига кўра, микроқарзларнинг ўртача фоиз ставкаси 32,9 % ни ташкил этмоқда. Бу кўрсаткич ўтган ойга нисбатан 0,9 % пунктга паст.
Энг юқори фоиз ставкалари Anor Bank (41 %), TBC Bank (40,2 %), Tenge Bank (39,7 %) ва Апехбанк (39,6 %) ҳиссасига тўғри келган. Энг паст ставкалар эса Инфинбанк (25,4 %), BRB Bank (25,5 %), Трастбанк (25,6 %), OFB Bank (25,8 %) ҳамда Алоқабанк (26,4 %)да кузатилган.
Шунингдек, жисмоний шахсларга ажратилаётган кредитлар (микроқарзларсиз) бўйича ўртача фоиз ставкаси 23,4 % ни, юридик шахслар учун эса 23,5 % ни ташкил қилмоқда.
27 октябрь ҳолатига кўра, автокредитларнинг ўртача фоиз ставкаси 24,3 % бўлиб, энг юқори ставкалар Universal Bank (30 %), Madad Invest Bank (28,3 %) ва СҚБ (27,5 %)да қайд этилган. Энг паст ставкалар эса Garant Bank (17,2 %), Ipoteka Bank (19,9 %) ва OFB Bank (21,2 %) томонидан таклиф этилган.
