Meta, Apple, Google ва OpenAI: 9 ой ичида хорижий техно-гигантлар Ўзбекистонда қанча солиқ тўлади?

Ўзбекистонда электрон хизматлар кўрсатувчи хорижий компаниялар 2025 йилнинг январь–сентабр ойларида 124,8 миллиард сўм миқдорида солиқ тўлади. Бу ҳақда Давлат солиқ қўмитаси маълум қилди.

Маълумотларга кўра, ушбу кўрсаткич 2024 йилнинг шу даврига нисбатан 44 фоизга ўсган.

Ҳисобот даврида Ўзбекистонда электрон шаклда хизмат кўрсатувчи хорижий компаниялар сони 73 тага етди. Бу рақам йил бошидан бери 10 тага, ўтган йил бошига нисбатан эса 18 тага кўпдир.

2025 йил январь–сентабр ойларида хорижий компаниялар томонидан кўрсатилган электрон хизматлар қиймати 1,048,6 трлн сўмни ташкил этган. Тўланган солиқлар ҳажми эса 124,8 млрд сўм бўлиб, бу ҳам ўтган йилга нисбатан 44 фоиз ўсишни кўрсатади.

Энг кўп солиқ тўлаган компаниялар орасида Meta, Apple ва Google етакчилик қилмоқда.
Meta компанияси 293,4 млрд сўмлик хизмат кўрсатиб, 35,2 млрд сўм солиқ тўлаган. Apple’нинг кўрсаткичлари деярли шунга яқин — хизматлар ҳажми 292,6 млрд сўм, солиқ тўлови 35,1 млрд сўм. Google эса 265,8 млрд сўмлик хизмат учун 31,1 млрд сўм солиқ тўлаган.

Тўртинчи ўринни эса ChatGPT’нинг ишлаб чиқувчиси OpenAI эгаллади. Компания 39,8 миллиард сўмлик хизмат кўрсатиб, 4,7 миллиард сўм солиқ тўлаган. OpenAI яқинда 5 долларлик GO обуна турини Ўзбекистонда ҳам тақдим қилди. Бундан кейинги ойларда ҳам компания хизматлари ўсишини кутиш мумкин.

Топ ўнталикка шунингдек OpenAI (39,8 млрд / 4,7 млрд сўм), Booking.com (24,3 млрд / 2,9 млрд сўм), TikTok (22,3 млрд / 2,6 млрд сўм), Netflix (10,7 млрд / 1,3 млрд сўм), ACCA (9,6 млрд / 1,1 млрд сўм), Zoom (9,3 млрд / 1,1 млрд сўм) ва Amazon (10,7 млрд / 1,0 млрд сўм) компаниялари ҳам кирган.

Шу билан бирга, 2025 йилнинг дастлабки тўққиз ойи давомида 6 та компания рўйхатдан чиқарилган бўлса, 16 та янги хорижий компания Ўзбекистон солиқ тизимида ҳисобга олинган.

Шунингдек, 2025 йилнинг январь–сентабр ойларида 6 та компания рўйхатдан чиқарилган, бироқ 16 та янги компания ҳисобга олинган.