Март ойида кредит ва депозит ставкаларида пасайиш кузатилди — Марказий банк
Хусусан, жисмоний шахслар учун миллий валютадаги кредит ставкалари март ойида 0,4 фоиз бандга камайиб, йиллик ҳисобда 1,1 фоизга тушди.
Жисмоний шахсларнинг муддатли депозит ставкалари олти ойдан бери 22,1 фоиз даражасида сақланиб қолмоқда.
Марказий банк маълумотларига кўра, миллий валютада жисмоний шахслар учун ажратиладиган кредитлар бўйича фоиз ставкалари март ойида ўтган ойга нисбатан 0,4 фоиз бандга камайди. Бу кўрсаткич йиллик ҳисобда 1,1 фоиз бандга, 2024 йил декабрь ойидан буён эса 1,3 фоиз бандга пасайган.
Жисмоний шахсларнинг муддатли депозитлари бўйича ставкалар эса кетма-кет олтинчи ойда ўзгаришсиз қолиб, 22,1 фоиз даражасида сақланмоқда.
Март ойида омонатлар бўйича ставкалар 23 фоиздан ошмайдиган қилиб пасайтирилди. Ушбу тартиб 1 апрелдан кучга киргани сабабли, бу чора-тадбирларнинг реал таъсири апрель ойидан бошлаб сезилиши кутилмоқда.
Юридик шахсларнинг миллий валютадаги муддатли депозит ставкалари 2025 йил бошидан буён 0,4 фоиз бандга пасайиб, 16,4 фоизни ташкил этди. Ўтган йилнинг шу даврига нисбатан бу кўрсаткич 1,6 фоизга камайган.
Бошқа томондан, тадбиркорлик субъектлари учун ажратиладиган кредитлар бўйича фоиз ставкалари эса 0,2 фоизга ошиб, 22,7 фоизга етган.
Чет эл валютасидаги кредит ва депозитлар
Чет эл валютасидаги қисқа муддатли кредитлар бўйича ставка март ойида 10,6 фоизни ташкил этиб, ўтган йилга нисбатан 0,7 фоизга пасайди. Узоқ муддатли кредитлар эса 9,8 фоиз бўлиб, бир ойда 0,6 фоиз, ўтган йилга нисбатан 0,4 фоизга камайди.
Жисмоний шахсларнинг хорижий валютадаги муддатли омонатлари ўтган йил март ойида 5,4 фоиз бўлган бўлса, жорий йил мартида 4,9 фоизга тушди. Юридик шахсларнинг омонатлари эса 4,1 фоиздан 4,4 фоизга кўтарилди.
