Марказий банк валюта интервенцияларини босқичма-босқич қисқартиради — 2030 йилгача стратегия

Марказий банк 2026–2030 йилларга мўлжалланган валюта операциялари ва интервенциялари стратегиясини эълон қилди.

Ҳужжатда регуляторнинг ички валюта бозоридаги асосий ёндашувлари белгиланган. Унга кўра, валюта курси ёки унинг ўзгариши Марказий банк пул-кредит сиёсатининг мақсадли кўрсаткичи бўлмайди. Яъни Марказий банк сўмнинг долларга нисбатан маълум бир курсини сақлаб туришни кўзламайди.

Валюта интервенциялари эса ички бозорда йирик ёки кутилмаган талаб ва таклиф пайдо бўлганда унинг таъсирини юмшатиш, алмашув курсининг кескин тебранишларини чеклаш ва халқаро захираларнинг етарли ликвид қисмини сақлаш учун амалга оширилади.

Бунда интервенциялар бозор шакллантираётган курс йўналишини ўзгартирмаслиги керак. Яъни Марказий банк кескин тебранишларга қарши чиқиши мумкин, бироқ курснинг фундаментал трендини сунъий равишда бошқа томонга буришни мақсад қилмайди.

Стратегияда яна бир муҳим йўналиш белгиланган: молия бозори ривожланиши, иқтисодиётдаги долларлашув камайиши, капитал ҳаракати либераллашуви ва курс ўзгаришининг инфляцияга таъсири пасайиши билан Марказий банкнинг валюта операциялари ва интервенциялари ҳажми ҳамда даврийлиги қисқартириб борилади.

Шу билан бирга, маҳаллий ишлаб чиқарувчилардан сотиб олинган олтин ва бошқа қимматбаҳо металларни халқаро бозорда сотишдан тушган хорижий валютани ички бозорда сотиш давом этади. Стратегияда бундай операциялар валюта интервенцияларидан алоҳида тушунча сифатида ажратилган.

Марказий банк оддий валюта операцияларини валюта биржасида ҳам, биржадан ташқари бозорда ҳам амалга ошириши мумкин. Интервенциялар эса фақат валюта биржасида ўтказилади.

Стратегия сузувчи алмашув курси режимини ривожлантиришга қаратилган бўлиб, 2030 йилгача амал қилади.