Марказий банк июнь ойида 21 та банкни жаримага тортди

Марказий банкнинг Банк назорати қўмитаси июнь ойида қонунчилик ва пруденсиал меъёрлар бузилгани учун 21 та банк, битта микромолия ҳамда битта тўлов ташкилотига жарима санкцияларини қўллади. Яна 23 та банк эҳтимолий чора ва санкциялар ҳақида огоҳлантирилди.

Марказий банк Банк назорати қўмитаси 2026 йил июнь ойида жами еттита йиғилиш ўтказиб, 34 та масалани кўриб чиқди ва улар юзасидан тегишли қарорлар қабул қилди.

Кўриб чиқилган масалаларнинг 22 таси рўйхатга олиш ва рухсат бериш йўналишига тегишли бўлган. Жумладан, кредит ташкилотлари уставига киритилган ўзгартиришларни рўйхатдан ўтказиш бўйича олтита, аудиторларга банкларда текширув ўтказиш ҳуқуқини берувчи малака сертификатларини тақдим этиш бўйича учта масала муҳокама қилинган.

Шунингдек, микромолия ташкилотларини ҳисоб рўйхатидан ўтказиш ва тўлов ташкилотига лицензия бериш бўйича тўртта, кредит ташкилотлари устав фондидаги улушга эгалик қилишга рухсат бериш бўйича бешта масала кўриб чиқилган. Банкларнинг кузатув кенгаши ва бошқаруви аъзолари ҳамда муҳим аҳамиятга эга ходимлар номзодларига доир яна тўртта масала муҳокама қилинган.

Бундан ташқари, кредит ва тўлов ташкилотларининг молиявий ҳолатига оид 12 та масала кўриб чиқилган. Улар Марказий банк кўрсатмалари ва пруденсиал меъёрларга риоя этилиши, инспекция текширувлари натижалари ҳамда тақсимланмаган фойдани тақсимлаш билан боғлиқ бўлган.

Пруденсиал нормативларга риоя қилмагани ёки фаолиятини қонунчилик талабларига мувофиқлаштирмагани учун 23 та банк чора ва санкциялар қўлланиши мумкинлиги ҳақида огоҳлантирилган.

Инспекция текширувлари ва ўрганишларда аниқланган камчиликлар учун эса 21 та банк, битта микромолия ташкилоти ва битта тўлов ташкилотига жарима санкциялари қўлланилган. Марказий банк жаримага тортилган ташкилотлар номлари ва жарималар миқдорини маълум қилмаган.