Марказий банк 23 та банк ва 2 та микромолия ташкилотига жарима қўллади

Марказий банкнинг Банк назорати қўмитаси 2025 йил июнь–июль ойларида ўтказилган 11 та йиғилишда жами 59 та масалани кўриб чиқди.

Рўйхатга олиш ва рухсат бериш йўналиши бўйича 37 та масала кўриб чиқилган бўлиб, улар қуйидагиларни ўз ичига олади:

• Кредит ташкилотлари уставига киритилган ўзгартиришларни рўйхатдан ўтказиш — 7 та;
• Янги микромолия ташкилотларини ҳисоб рўйхатидан ўтказиш — 5 та;
• Кредит ташкилотлари устав фондидаги улушга эгалик қилиш учун рухсат бериш — 2 та;
• Микромолия банки фаолиятини бошлаш учун дастлабки рухсат бериш — 1 та;
• Банкларда аудит ўтказиш ҳуқуқини берувчи аудиторлик малака сертификати тақдим этиш — 2 та;
• Тижорат банклари кузатув кенгаши, бошқарув аъзолари ва муҳим аҳамиятга эга ходимлар номзодларини кўриб чиқиш — 20 та.

Кредит ташкилотларининг молиявий ҳолатига оид 22 та масала ҳам муҳокама қилинди. Улар Марказий банкнинг кўрсатмалари ва пруденсиал меъёрлари бажарилиши, банк ва микромолия ташкилотларида ўтказилган инспекция натижалари, шунингдек, жиноий фаолиятдан олинган даромадларни легаллаштириш, терроризм ва оммавий қирғин қуролини молиялаштиришга қарши кураш масалаларини қамраб олди.

Бундан ташқари, тўлов тизими операторлари ва тўлов ташкилотлари устав капиталининг энг кам миқдорини шакллантириш талаблари бузилгани ва бошқа камчиликлар аниқлангани учун 15 та тўлов ташкилотига нисбатан чора ва санкциялар қўлланиши ҳақида огоҳлантириш берилди.

Текширувлар натижасида жиноий фаолиятдан олинган даромадларни легаллаштириш, терроризмни ва оммавий қирғин қуролини молиялаштириш қоидаларини бузганлик ҳолатлари аниқланиб, 23 та банк ва 2 та микромолия ташкилотига жарима санкциялари қўлланди. Марказий банк ушбу ташкилотлар номини ошкор этмади.

Шунингдек, “IMKON FINANS MIKROMOLIYA TASHKILOTI” АЖда аниқланган қоидабузарликлар сабабли кредитлаш, лизинг, кафолат бериш ва факторинг хизматларини кўрсатиш бўйича операциялар уч ой муддатга чеклаб қўйилди.