Madad Invest Bank асосчиси Мўминжон Йўлдашев халқаро қидирувга берилди
Интерпол Мўминжон Йўлдашевга нисбатан 2026 йил 15 сентябрда Red Notice эълон қилди. У Ўзбекистонда ўзлаштириш ёки растрата йўли билан талон-торож қилишда айбланмоқда.
Йўлдашев 2024 йилда Madad Invest Bank кузатув кенгаши раислигидан кетган, аммо банк акцияларининг асосий қисми ҳали ҳам унинг оила аъзолари ва уларга боғлиқ компания қўлида қолмоқда.
Pinkod тадбиркорнинг Madad Invest Bank билан боғлиқ собиқ ва ҳозирги алоқаларини ўрганиб чиқди.
Фарғоналик тадбиркор, Madad Invest Bank’нинг собиқ йирик акциядори ва кузатув кенгаши раиси Мўминжон Йўлдашев Ўзбекистон сўрови асосида Интерпол орқали халқаро қидирувга берилди.
Интерпол маълумотларида 1976 йил 18 февралда Фарғона вилоятида туғилган Мўминжон Йўлдашевга нисбатан 2026 йил 15 сентябрда Red Notice эълон қилингани кўрсатилган.
Қидирувга Ўзбекистон Жиноят кодексининг 167-моддаси 3-қисми, яъни ўзлаштириш ёки растрата йўли билан талон-торож қилиш бўйича қўйилган айблов асос қилиб кўрсатилган.
Madad Invest Bank’даги роли
Йўлдашев узоқ йиллар Madad Invest Bank’нинг асосий акциядорларидан бири ва банк кузатув кенгаши раиси бўлган.
2018 йилги корпоратив ҳужжатларда унга банкнинг 578 минг дона оддий акцияси тегишли экани қайд этилган. Кейинги йилларда банк капитали бир неча бор оширилган.
2023 йил августда банк устав капиталини яна 50 млрд сўмга ошириш учун номинал қиймати 5 минг сўмдан бўлган 10 млн дона янги акция чиқаришга қарор қилган. Акциялар амалдаги акциядорлар ўртасида уларнинг улушига мутаносиб равишда жойлаштирилиши белгиланган. Кейинчалик Йўлдашевнинг ўз номига расмийлаштирилган улуши 25,09 фоизгача ошган.
2024 йилда эса банк бошқарувида ўзгариш юз берган. Акциядорлар қарори билан Йўлдашевнинг кузатув кенгаши аъзоси ва раиси сифатидаги ваколатлари 16 февралдан муддатидан олдин тугатилган. Унинг ўрнига Шерзод Хаджизадаев кенгашга сайланган, банкнинг юридик манзили эса Фарғонадан Тошкентга кўчирилган.
Шунга қарамай, банкнинг амалдаги акциядорлик таркиби унинг оилавий бизнес доираси билан алоқа сақланиб қолганини кўрсатади. Ҳозир Madad Invest Bank акцияларининг 30,94 фоизи “Log‘on Agrosanoat Lyuks”га, 26,56 фоизи Равшанжон Шокиржоновга, 26,33 фоизи Далер Шокиржоновга ва 16,2 фоизи Рахшона Шокиржоновага тегишли.
Шу тариқа, ушбу тўрт акциядор банк капиталининг амалда 100 фоизини назорат қилади. Равшанжон ва Далер Шокиржоновлар Мўминжон Йўлдашевнинг ўғиллари бўлиб, Равшанжон айни пайтда банк кузатув кенгаши аъзоси сифатида ҳам фаолият юритмоқда.
Шу сабаб Йўлдашев 2024 йилда банк кузатув кенгаши раҳбарлигидан кетган бўлса-да, Madad Invest Bank унинг оилавий бизнес доираси билан боғлиқлигича қолмоқда.
Қурилиш ва тўқимачилик бизнеслари
Йўлдашев фаолияти фақат банк соҳаси билан чекланмаган.
Корпоратив ва расмий ҳужжатларда у “Баходир Лоғон Текстил” пахта-тўқимачилик корхонаси директори ўринбосари сифатида ҳам кўрсатилган.
У аввал қурилиш соҳасида ҳам катта бизнес юритган. Жаҳон банки ҳужжатларида Йўлдашев “Quvasoy Tamir Qurilish” компаниясининг асосчиси ва эгаси сифатида кўрсатилган. Кейинчалик мазкур бизнес Stroy Montaj Invest номи билан ҳам корпоратив ҳужжатларда учрайди.
Madad Invest Bank’нинг дастлабки йилларида Quvasoy Tamir Qurilish банк билан бевосита молиявий алоқада бўлган. Масалан, 2017 йилги акциядорлар йиғилишида банкни ташкил этиш жараёнида ушбу компания ҳисобидан қилинган 329,3 млн сўмлик ташкилий харажатларни компанияга қайтариш ҳақида қарор қабул қилинган.
Банкнинг кузатув кенгашида ҳам Йўлдашевга яқин бизнеслар вакиллари бўлган. Турли йилларда Stroy Montaj Invest бош ҳисобчиси, Royal Thai Group вакили ҳамда Fergana-Oseana ходими кузатув кенгаши таркибида қайд этилган.
Жаҳон банки уни тўрт йилга четлатган
Мўминжон Йўлдашев номи халқаро молия институтлари ҳужжатларида ҳам аввал пайдо бўлган.
2019 йил 8 июлда Жаҳон банки уни ўз лойиҳаларида иштирок этишдан камида тўрт йилга четлатган.
Иш Ўзбекистондаги Сирдарё сув таъминоти лойиҳаси учун қурилиш тендери билан боғлиқ бўлган. Жаҳон банкининг Integrity Vice Presidency тузилмаси Йўлдашевни рақобатчи компания вакилига тендердаги таклифини қайтариб олиши учун таҳдид ва босим ўтказганликда айблаган.
Жаҳон банки ҳужжатларида мазкур ҳаракат “coercive practice”, яъни мажбурлаш амалиёти сифатида баҳоланган.
Санкция Йўлдашевнинг ўзи билан бирга у бевосита ёки билвосита назорат қилган қатор компанияларга ҳам татбиқ этилган. Жаҳон банки ва бошқа халқаро молия институтларининг cross-debarment рўйхатларида Quvasoy Tamir Qurilish, Fergana Oseana, Royal Thai Group, Royal Thai Construction ва бошқа компаниялар ҳам қайд этилган.
Жаҳон банкининг йиллик ҳисоботида Йўлдашевга нисбатан санкциянинг асоси ҳам “coercive practices” сифатида кўрсатилган.
Сиёсий фаолиятда ҳам бўлган
Йўлдашев бизнес фаолияти билан бир вақтда маҳаллий сиёсий жараёнларда ҳам иштирок этган.
Ўзбекистон Халқ демократик партияси маълумотларида у Фарғона вилояти Кенгашининг 56-Аввал сайлов округидан сайланган депутати сифатида кўрсатилган. Унинг ўша вақтдаги асосий иш жойи Madad Invest Bank кузатув кенгаши раиси лавозими бўлган.
Ҳозирча ҳуқуқни муҳофаза қилувчи органлар Йўлдашевга нисбатан 167-модда 3-қисми бўйича қўйилган айблов қайси активлар, компаниялар ёки операциялар билан боғлиқ экани ҳақида батафсил маълумот эълон қилмаган.
Шунингдек, Интерполда Red Notice жойлаштирилгани Йўлдашевнинг айбдор деб топилганини англатмайди. Унинг айбдорлиги фақат суднинг қонуний кучга кирган ҳукми билан белгиланиши мумкин.
