KFC, EVOS ва Oqtepa: умумий овқатланиш корхоналари 10 ойда 1,4 трлн сўм солиқ тўлади?
Бу маблағнинг бешдан бир қисми энг йирик 20 та компания ҳиссасига тўғри келган бўлиб, улар орасида KFC, Evos ва Oqtepa Lavash тармоқлари етакчилик қилмоқда.
2025 йилнинг январь–октябрь ойларида умумий овқатланиш соҳасидаги корхоналар 1 трлн 412 млрд сўм миқдорида солиқ тўловларини амалга оширди. Бу ҳақда Солиқ қўмитаси хабар берди.
Ҳисобот даврида умумий овқатланиш билан шуғулланувчи 20 318 та юридик шахс фаолият юритган. Уларнинг умумий товар айланмаси 16,8 трлн сўмни ташкил этган бўлса, берилган солиқ имтиёзлари ҳажми 128 млрд сўмга тенг бўлди.
Шу билан бирга, соҳага оид энг кўп солиқ тўловчи ТОП-20 корхона жами 275,1 млрд сўм солиқ тўлаган. Бу эса умумий сумманинг 19,5 фоизини ташкил этади.
Энг кўп солиқ тўловчи корхоналар
Энг кўп солиқ тўлаган компания — халқаро KFC тармоғининг Ўзбекистондаги франшиза ҳисобланган International Foodchain бўлди. Бу корхона 10 ойда 78,7 млрд сўмлик солиқ тўловларини амалга оширган.
Иккинчи ўринга эса 56,3 млрд сўм солиқ тўлаган Mak Food Servis компанияси жойлашди. Ушбу компания мамлакат бўйлаб танилган Evos бренди остида фаолият юритади.
Кучли учликни эса 31,9 млрд сўмлик солиқ билан Oqtepa Food Service якунлади — бу корхона машҳур Oqtepa Lavash тармоғининг оператори ҳисобланади.
Тўртинчи ўринни 29,5 миллиард сўмлик солиқ тўлови билан Ketring МЧЖ эгаллади. Кучли 5 ликни нисбатан камроқ солиқ тўловлари билан Feed Up (6,7 млрд сўм) якунлаб берган.
Шунингдек, “Савдо” МЧЖ (6,7 млрд сўм), Maxway Food МЧЖ (5,7), French Pastry МЧЖ (5,4 млрд сўм), Bellissimo Pizza International МЧЖ (5,2 млрд сўм), Chef Catering МЧЖ (5 млрд сўм), Dodo Pizza Tashkent МЧЖ (3,5 млрд сўм) каби машҳур овқатланиш тармоқлари ҳам ТОП-20 талигига кирди.
