Жанубий Кореянинг Shinhan Bank’и Ўзбекистонда шўба банк очишни режалаштирмоқда

Жанубий Кореянинг Shinhan Bank банки Ўзбекистон бозорига тўлиқ кириб келишга тайёрланмоқда. Бу ҳақда бир неча хорижий нашрлар ёзмоқда

Молиявий саноатдаги манбаларга кўра, Shinhan Bank Ўзбекистонда маҳаллий шўба банк ташкил этиш бўйича ички қарорини якунлаган ва жорий йилнинг биринчи ярми давомида мамлакат молиявий регуляторларига ариза топширишни режалаштирмоқда.

Агар тасдиқланса, бу Shinhan Bank’нинг хориждаги 11-шўбаси бўлади.

Банк аллақачон маҳаллий регуляторлар билан мувофиқлашув ишларини олиб борган ва тайёргарлик жараёнининг катта қисми якунлангани айтилмоқда.

Молиявий саноат вакилларидан бирининг айтишича, Ўзбекистондаги банк келаси йилнинг ўзидаёқ тўлиқ фаолият бошлаши мумкин.

Шинҳан Банкнинг Ўзбекистон бозорига кириш режалари бундан 17 йил аввал бошланган. Банк 2008 йилда қўшни Қозоғистонда шўба банк очганидан сўнг, 2009 йилда Тошкентда ваколатхона ташкил этган. 2024 йилда эса банк марказий офисидан ходимлар Ўзбекистонга юборилиб, маҳаллий молиявий регуляторлар билан расмий музокаралар бошланган.

Шўба банк ташкил этиш бўйича келишув аста-секин шакллана бошлагач, Жин Ок-донг шахсан жараёнга қўшилиб, ўтган йилнинг апрель ойида Ўзбекистонга ташриф буюрди. Ташриф давомида шўба банк очиш масаласи ҳамда мамлакат молия тизимининг бошқа жиҳатлари муҳокама қилинган.

Шинҳан Банк Ўзбекистонни навбатдаги хорижий бозор сифатида унинг юқори ўсиш салоҳияти сабаб танлаган. Шунингдек, банк тахминан 14 фоиз атрофидаги юқори фоиз ставкалари фонида кредитлар ва валюта операцияларига талаб ортиб бораётганини ҳам инобатга олган.

“Ветнам бозорига дастлабки босқичда кирганимиз каби, бозор шаклланиш жараёнида кириш узоқ муддатли рақобат устунлигини қўлга киритиш имконини беради”, — дейди Shinhan Bank вакили.

Банк Ўзбекистондаги шўбасини Қозоғистондаги муваффақиятли модель асосида ривожлантиришни режалаштирмоқда.

Қозоғистондаги шўба банк дастлаб корейс компанияларига корпоратив молиялаштириш хизматларини кўрсатишга эътибор қаратган, кейинчалик эса портфелини маҳаллий йирик компаниялар ва ипотека кредитларига асосланган чакана молия хизматлари томон кенгайтирган.

Натижада, Қозоғистон Ветнам ва Япония билан бир қаторда Шинҳанънинг глобал бизнесидаги уч асосий таянч бозордан бирига айланган.

Саноат вакилларининг фикрича, банк Ўзбекистонга киргач, Қозоғистон ва Ўзбекистон ўртасида интеграциялашган операцияларни ҳам ривожлантириши мумкин.

Манбаларга кўра, Shinhan Bank Ўзбекистонда ҳам Қозоғистондаги каби Shinhan Card Co. билан биргаликда кенгайишни режалаштирмоқда.

Қозоғистонда банк Aster Auto – мамлакатнинг йирик ишлатилган автомобиллар дилери билан қўшма корхона ташкил этиб, Shinhan Finance орқали автокредит бозорида фаолиятини кенгайтирган.

Банк ушбу компаниянинг маҳаллий тармоғидан фойдаланиб, Ўзбекистонда ҳам ишлатилган автомобилларни молиялаштириш бозорига киришни режалаштирмоқда.

Маълумот учун, ўтган йили Shinhan Financial Group глобал миқёсда 1 триллион вон (тахминан 682 миллион доллар) солиқдан олдинги фойдага эришган илк корейс молия компаниясига айланган.