“IMAN Invest’да рибонинг бир қанча аломатлари бор” — Маҳмуд Усмон

IFCB кенгаши аъзоси Маҳмуд Усмон янги мурожаатида IMAN Invest’нинг молиялаштириш шартномалари ва инвесторларга тақдим этилган янги офертасига оид шаръий эътирозларини тушунтирди.

“Компанияда рибонинг бир қанча аломатлари бор. Шулардан бирини мисол келтирадиган бўлсам, SAFE шартномалари”, деди Маҳмуд Усмон.

Қарз ва келажакда улуш бериш ваъдаси

SAFE — Simple Agreement for Future Equity, яъни келажакда компаниядан улуш олишга доир келишувдир.

Маҳмуд Усмоннинг айтишича, у кўрган IMAN шартномаларида жалб қилинган маблағлар қарз сифатида қайд этилган. Кейинчалик бу маблағларни компаниядаги улушга айлантириш назарда тутилган.

Олим айнан қарз бериш билан келажакда улуш олиш шарти бирлаштирилганига эътироз билдирди. У мазкур тузилмани қарз берувчига манфаат келтирувчи шарт ҳамда қарз билан савдони бирлаштириш сифатида баҳолади.

“SAFE шартномалари ҳалол бўлишининг йўллари бор. У нарсаларга амал қилинмаган”, деди исломшунос.

Маҳмуд Усмон мазкур шартномалар орқали бир неча миллион доллар жалб қилинганини айтди. У маблағлар инвесторлар пули жамланадиган фондга эмас, бошқарув компаниясига улушдор бўлиш ваъдаси асосида олинганини таъкидлади.

Раҳматовнинг 70 фоизлик улуши ва SAFE инвесторлари

Маҳмуд Усмон компания раҳбари иштирокидаги суҳбатда Рустам Раҳматовдан унинг улуши қанча экани сўралганини айтди.

Олимнинг келтиришича, Раҳматов ўз улушини 70 фоиз деб кўрсатган. SAFE шартномалари ҳисобга олинса, бу кўрсаткич 30–35 фоиз бўлишини билдирган.

Маҳмуд Усмоннинг сўзларига кўра, айрим SAFE шартномалари икки йил, бошқалари эса тўрт-беш йил аввал тузилган. Маблағ берган шахсларга бир ёки икки йил ичида улушдор сифатида расмийлаштириш ваъда қилинган бўлса-да, жараён якунланмаган.

Исломшунос бу шахсларни расмийлаштириш компаниянинг қанча қисми кимга тегишли эканини аниқлаш учун ҳам зарурлигини таъкидлади.

IMAN расмий баёнотида холдинг акциядорлари ва SAFE шартномалари асосида кирган инвесторлар таркибини тўлиқ рўйхатдан ўтказиш ҳақида қарор қабул қилинганини маълум қилган. Компания бу иш бир ой ичида амалга оширилишини билдирган.

Шартномалар кенгашга кўрсатилмагани айтилмоқда

Маҳмуд Усмонга кўра, SAFE шартномалари тузилган пайтда компания IFCB билан ҳамкорлик қилган. Аммо бу ҳужжатлар кенгашга шаръий жиҳатдан кўриб чиқиш учун берилмаган.

“Бизга айтилмаган, мана бу шартнома ҳалолми, бир кўриб беринг дейилмаган. Мана шунақа ишласам бўладими дейилмаган. Биз кейин булардан хабар топганмиз”, деди олим.

Унинг таъкидлашича, компания билан келишув ҳар бир шартномани аввал кенгашга тақдим этиш ва тасдиқлатишни назарда тутган.

Маҳмуд Усмон компания раҳбарига бошқарувдан тўлиқ кетиш, SAFE шартномаларидаги шаръий эътирозларни бартараф этиш ва маблағ берган шахсларни расмийлаштириш шартлари қўйилганини ҳам айтди.

Унинг сўзларига кўра, бу шартлар бажарилса, кенгаш очиқ баёнот бермасдан яна икки-уч ой вақт беришга тайёр бўлган. Олим мазкур таклиф бўйича розиликка эришилмаганини билдирди.

Янги офертанинг мазмуни ва санасига эътироз

Маҳмуд Усмон сентябрь санаси билан расмийлаштирилган янги оферта ҳам IFCBга тақдим этилмаганини айтди. У ҳужжатда кенгаш тасдиғи йўқлигини таъкидлади.

“Шу оферта 15–16 сентябрда имзоланган бўлса, нимага бизга берилмаган? Нимага шу офертада бизнинг имзоимиз турмаяпти?” деди Маҳмуд Усмон.

Олимнинг даъвосига кўра, янги офертага инвестор маблағини қисман ёки тўлиқ йўқотиши мумкинлигига доир 9.5-банд қўшилган. У янги шартларни аввал маблағ киритган инвесторларга татбиқ этишга эътироз билдирди.

Исломшунос кенгаш тайёрлаган ҳужжатларда янги оферта янги инвесторларга қўлланиши, аввалги инвесторларга эса татбиқ этилмаслиги белгиланганини айтди.

Маҳмуд Усмон офертада кўрсатилган сана билан унинг амалда эълон қилинган вақти бўйича ҳам саволлар борлигини билдирди. Унинг даъвосига кўра, ҳужжат сентябрь санаси билан расмийлаштирилган бўлса-да, кейинроқ эълон қилинган. Олим унинг қачон тайёрлангани ва эълон қилинганини экспертлар текширишини сўради.