Илон Маскнинг Grok сунъий интеллекти Telegram’га интеграция қилинади
Илон Маск ва Павел Дуров ўртасидаги келишув натижасида Grok сунъий интеллекти ёздан бошлаб Telegram’нинг барча версияларида пайдо бўлади.
Telegram бу ҳамкорлик эвазига $300 миллион ва обуналардан тушадиган даромаднинг ярмини олади.
Telegram мессенжери Илон Маскга тегишли xAI сунъий интеллект компанияси билан ҳамкорликка киришди. Ушбу ҳамкорлик доирасида xAI компаниясининг Grok номли сунъий интеллект чатботи Telegram платформасига интеграция қилинади ҳамда мавжуд иловалар орқали фойдаланувчиларга тақдим этилади.
Telegram асосчиси Павел Дуров сешанба куни ушбу келишув тафсилотларини эълон қилди. Унинг сўзларига кўра, xAI компанияси бу ҳамкорлик учун Telegram’га $300 млн миқдорида нақд маблағ ва акциялар беради.
Шунингдек, Дуров Telegram орқали сотилган xAI обуналаридан тушган даромаднинг 50 фоизи компанияга тегишли бўлишини маълум қилди.
Павел Дуров ўз постига жойлаган видеода Grok ёрдамида мессенжерда турли функцияларни бажариш – жумладан, саволларга жавоб олиш, постларни таҳрир қилиш, матн бўйича хулоса чиқариш, шунингдек, аватарлар ва эможилар яратиш имконияти намойиш этилган.
xAI хизмати Telegram’да шу йил ёзда ишга туширилиши режалаштирилган. Айни пайтда хизматнинг аниқ ишга тушиш санаси ва обуна нархлари маълум қилинмаган.
Эслатиб ўтамиз, Grok ҳозирда Х (собиқ Twitter) платформасида фойдаланиш учун мавжуд. Бепул фойдаланувчилар учун баъзи чекловлар мавжуд бўлса-да, премиум хизмат ойига 40 доллар ёки йиллик 395 доллар эвазига тақдим этилади.
