Илон Маск OpenAI’ни сотиб олишга ҳаракат қилмоқда
У ва бошқа бир гуруҳ инвесторлар ChatGPT’га эгалик қилувчи компанияни сотиб олиш учун қарийб $100 млрдлик таклиф билан чиқди.
Илон Маск бошчилигидаги инвесторлар OpenAI’ни назорат қилувчи нотижорат ташкилотни сотиб олиш учун 97,4 миллиард доллар таклиф қилмоқда. Бу ҳақида Wall Street Journal хабар берди.
Маскнинг адвокати Марк Тоберофф 11 январь куни OpenAI директорлар кенгашига нотижорат ташкилотнинг барча активларини сотиб олиш бўйича таклиф киритганини маълум қилди.
Ушбу кутилмаган таклиф Алтманнинг OpenAI келажаги бўйича режалаштирган стратегиясига жиддий тўсиқ бўлиши мумкин. У OpenAI’ни тўлиқ тижорат компаниясига айлантириш ва Stargate деб номланган қўшма корхона орқали AI инфратузилмасига 500 миллиард долларгача маблағ сарфлашни режалаштирмоқда. Шунингдек, Альтман ва Маск OpenAI йўналиши бўйича аллақачон судда кураш олиб бормоқда.
“OpenAI’ни ўзининг очиқ манбали, хавфсизликка йўналтирилган ва жамиятга фойдали бўлган асл мақсадига қайтиши керак. Биз бунга албатта эришамиз” деди Маск ўз баёнотида.
Альтман эса Х (собиқ Twitter) платформасида Маскнинг таклифига жавобан: “Йўқ, раҳмат, лекин агар хоҳласангиз, биз Twitter’ни 9,74 миллиард долларга сотиб олишимиз мумкин”, деб ҳазил қилди. У Маскнинг OpenAI’ни сотиб олиш таклифидаги рақамдаги вергулини бир ўрин чапга суриб қўйди.
Бу вазиятни янада мураккаблаштираётган омил Microsoft билан OpenAI ҳамкорлигидир. Microsoft компанияга миллиардлаб сармоя киритган бўлиб, OpenAI’нинг GPT-4 технологиясини ўз дастурларига интеграция қилган. Бу эса Microsoft’нинг AI саноатидаги мавқеини мустаҳкамлашга хизмат қилмоқда.
"Биз X.AI’да OpenAI менга ваъда қилган қадриятларга амал қиламиз. Биз Grok’ни очиқ манбага айлантириб, контент яратувчиларининг ҳуқуқларини ҳурмат қиламиз”, деди Маск, X.AI томонидан яратилган сунъий интеллект иловасига ишора қилиб.
Инвесторлар гуруҳига Маскнинг X.AI компанияси, Baron Capital Group, Valor Management, Altreides Management, Vy Fund III, Emanuel Capital Management ва Eight Partners VC киради, деб маълум қилди инвесторлар вакили Марк Тоберофф.
97,4 миллиард долларлик таклифдан олинган маблағлар “фақатгина OpenAI’нинг дастлабки нотижорат мақсадларини ривожлантириш учун сарфланади”, деди инвесторлар гуруҳи ўз баёнотида. Бундан ташқари, Илон Маск бошчилигидаги инвесторлар кимдир бунданда юқорироқ таклиф берса, улар билан ҳам рақобатлашишга тайёрлигига ишоралар мавжуд.
