Илон Маск бойлиги $600 млрддан ошган илк инсонга айланди
SpaceX компанияси қийматининг кескин ўсиши Илон Маск бойлигини $677 млрдга олиб чиқди. Tesla ва xAI’даги улушларини ҳисобга олганда, у тарихда биринчи бўлиб триллион долларлик бойликка эга инсон бўлишига ҳар қачонгидан ҳам яқинлашди.
Январь ноябрь бойлиги 600 млрддан ошган тарихдаги биринчи инсон бўлди. Бу ҳақда Forbes хабар берди.
Маск дунёда биринчи бўлиб триллион долларлик бойликка эга бўлишга жуда яқинлашмоқда. Бунга асосий сабаб унинг ракета ишлаб чиқарувчи SpaceX компанияси қийматининг кескин ошишидир. Яқинда SpaceX тендер таклифи ўтказиб, компания қийматини $800 млрд деб баҳолади. Бу август ойидаги баҳодан икки баравар юқори.
SpaceХ’нинг тахминан 42 фоизи Илон Маскга тегишли, шу сабабли унинг бойлиги бир кунда $168 млрдга ошиб, $677 млрдга етди. Шу тариқа Маск тарихда $600 млрддан ортиқ бойликка эга бўлган илк инсон бўлди.
SpaceX 2026 йилда IPO ўтказишни режалаштирмоқда. Агар компания оммавий бозорга $1,5 трлн атрофида чиқса, Маск автоматик равишда триллионерга айланиши мумкин. Ҳатто IPO бўлмаган тақдирда ҳам, Маскнинг СпаcеХъдаги улуши ҳозир унинг энг қиммат активи бўлиб, тахминан $336 млрдга баҳоланмоқда.
Маскнинг иккинчи йирик активи Tesla компаниясида. У компаниянинг 12 фоиз акциясига эга ва бу улуш ҳозир $197 млрд туради. 2018 йилда берилган, лекин 2024 йилда суд томонидан бекор қилинган опционлар бўйича масала ҳали якунланмаган.
Триллион доллар сари
Агар Маск апелляцияда ютқазса ҳам, Tesla орқали триллионер бўлиш эҳтимоли сақланиб қолади. Чунки акциядорлар Маск учун рекорд даражадаги янги мукофот пакетини тасдиқлаган: агар Tesla кейинги ўн йил ичида бозор қийматини бир неча баравар ошира олса, Маск $1 трлнгача бўлган қўшимча акцияларни қўлга киритиши мумкин.
Бундан ташқари, Маскнинг сунъий интеллект ва ижтимоий тармоқларни бирлаштирган xAI Holdings компанияси ҳам тез ўсмоқда. У ҳозир $230 млрд баҳода янги инвестициялар жалб қилиш арафасида. Forbes ҳисобига кўра, Маск бу компаниянинг 53 фоизига эгалик қилади, бу эса унинг бойлигига яна $60 млрд қўшади.
Сўнгги беш йил ичида Маск бойлиги мислсиз тезликда ошди. 2020 йилда у атиги $24,6 млрд бойликка эга эди. Tesla акциялари туфайли у 2021 йилда дунёнинг энг бой одамига айланди ва кетма-кет 100, 200, 300, 400 ва 500 миллиард долларлик марраларни босиб ўтди. Бугунга келиб у энг яқин рақиби Ларри Пейждан 425 миллиард доллар олдинда ва 700 миллиард доллар чегарасига ҳам жуда яқин турибди.
Илон Маск ҳозир нафақат дунёнинг энг бой одами, балки инсоният тарихидаги биринчи триллионер бўлиш эҳтимоли энг юқори шахсга айланган. Агар SpaceX, Tesla ёки xAI режалари амалга ошса, бу тарихий воқеа яқин йилларда содир бўлиши мумкин.
