Илон Маск бойлиги $300 млрддан пастга тушиб кетди
Йил бошидан бери Маскнинг бойлиги 31 фоиз ёки $135 млрдга камайган.
Илон Маскнинг бойлиги 2024 йилдан бери илк маротаба $300 млрддан пастга тушиб кетди. Бунга асосий сабаб сифатида Tesla’нинг тушиб бораётган акциялари ва Доналд Трамп томонидан эълон қилинган тарифлар кўрсатилмоқда.
Дунёнинг энг бой одами ҳозирда Bloomberg миллиардерлар индексига кўра, $298 млрд бойликка эга. Душанба кунинг ўзида унинг бойлиги 4 млрддан кўпроққа озайган. Йил бошидан бери эса Маскнинг бойлиги 31 фоиз ёки $135 млрдга камайган.
Илон Маск декабрь ойида $400 млрддан ортиқ бойликка эга бўлган илк миллиардерга айланган эди. Ўшанда унинг бойлиги $447 млрдга етган эди.
Маск бойлигидаги пасайиш асосан Tesla акциялари тушиши билан боғлиқ. Йил бошидан бери электромобиллар ишлаб чиқарувчи компания акциялари деярли 40 фоизга камайган.
Маск ва Тесла унинг Оқ уйдаги фаолияти, айниқса, Ҳукумат самарадорлиги департаментидаги(ДОГЕ) роли туфайли жиддий норозиликларга дуч келмоқда. Илоннинг сиёсий фаолияти натижасида Tesla савдолари Европада сезиларли даражада камаймоқда.
Тесла ва Маскнинг бойлигига ўтган ҳафта Трамп маъмурияти эълон қилган ва молия бозорларини ларзага келтирган кенг қамровли тарифлар ҳам таъсир кўрсатиши мумкин. Трампнинг энг катта қўлловчиси бўлган Илон Маскнинг ўзи ҳам тарифларга қарши эканлигини таъкидлаган.
Шанба куни у АҚШ ва Европа ўртасида "ноль" тарифлар ва "эркин савдо зонаси" бўлишини истаётганини айтди, душанба куни эса иқтисодчи Милтон Фридманнинг халқаро савдонинг афзалликларини тушунтираётган видеосини улашди.
Маскнинг бойлик йўқотишлари уни дунёнинг энг бой одами унвонидан маҳрум қилиш хавфини туғдирмади - иккинчи ўриндаги Жефф Безос ҳозирга келиб ҳамон Маскдан $100 млрддан кўпроқ маблағ билан ортда қолмоқда.
