Иккита Ўзбекистон компанияси Европа Иттифоқининг Россияга қарши санкциялар рўйхатига киритилди
Европа Иттифоқи Россияга қарши санкцияларнинг 20-пакети доирасида Ўзбекистондаги Фарғона кимё заводи ҳамда Raw Materials Cellulose компаниясини санкциялар рўйхатига киритди. Расмий маълумотларга кўра, ушбу корхоналар Россия ҳарбий саноати билан боғлиқ етказиб бериш занжирида иштирок этганликда гумон қилинмоқда. Мазкур икки компания аввалроқ Буюк Британия санкциялар рўйхатига ҳам киритилган.
Европа Иттифоқи Россиянинг Украинадаги урушига жавобан санкцияларнинг 20-пакетини эълон қилди. Янги рўйхатдан иккита ўзбекистонлик компания ҳам ўрин олди.
Гап Фарғона пахта целлюлозаси кимё заводи ҳамда Жиззах вилоятида жойлашган Raw Materials Cellulose компанияси ҳақида бормоқда.
Расмий баёнотга кўра, ушбу корхоналар пахта целлюлозаси ишлаб чиқариб, маҳсулотларини Россиядаги Перм ва Қозон порох заводларига етказиб берган. Мазкур хомашё кейинчалик Россия армияси эҳтиёжлари учун ишлатилган порох ишлаб чиқаришда қўлланган.
Ундан таҳсқари Фарғона кимё заводи Буюк Британия томонидан санкциялар рўйхатига киритилган Рустам Мўминов томонидан бошқарилиши таъкидланган.
Аввалроқ, санкцияларнинг 17-пакети доирасида ҳам Ўзбекистондан бир компания — “TRADE ENGINE SYSTEM” МЧЖ рўйхатга киритилган эди. Очиқ маълумотларга кўра, компания 2022 йил 27 июль куни рўйхатдан ўтган бўлиб, 2025 йил 20 май ҳолатига унинг 100 фоизлик таъсисчиси ва раҳбари Насиржон Акбаров ҳисобланади.
Шунингдек, 2025 йил 20 декабрь куни Буюк Британия ҳам Россияга қарши санкциялар рўйхатини кенгайтирган. Янгиланган рўйхатга 24 нафар янги шахс ва ташкилот киритилган бўлиб, улар орасида Ўзбекистонда фаолият юритувчи тўртта компания ва бир нафар тадбиркор ҳам бор.
Хусусан, чекловлар Фарғона кимё заводи, Gelion Business Trade, Chemistry International ва Raw Materials Cellulose компанияларига, шунингдек, Тошкентда туғилган тадбиркор Рустам Мўминовга нисбатан қўлланган.
Мазкур санкциялар доирасида ушбу шахс ва ташкилотларнинг Буюк Британия ҳудудидаги активлари музлатилади, уларга нисбатан қўшимча молиявий ва бизнес чекловлари жорий этилади.
Энг қатъий чоралар Фарғона кимё заводига нисбатан қўлланган: унинг активлари музлатилган ҳамда унга нисбатан траст (ишончли бошқарув) хизматларини кўрсатиш тақиқланган.
Британия расмийларига кўра, ушбу завод Украина суверенитетига путур етказишда қўлланиши мумкин бўлган маҳсулот ёки технологияларни етказиб берган бўлиши эҳтимолдан холи эмас.
