Ҳаёт Банк ZAMAN исломий микромолия банкини ташкил этмоқда

Ҳаёт Банк ягона акциядорининг 2026-йил 28-июлдаги қарори билан ZAMAN Исломий микромолия банки АЖ ташкил этилмоқда.

Корпоратив ахборот порталида эълон қилинган муҳим фактга кўра, ZAMAN Ҳаёт Банкнинг қарам хўжалик жамияти бўлади. Банк янги ташкилот устав капиталидаги улушнинг 100 фоизига эгалик қилади.

Янги банк Тошкент шаҳри Шайхонтоҳур тумани, Тахтапул маҳалласи, Лабзак кўчаси, 116-уйда жойлашиши кўрсатилган. Қарор ҳақидаги маълумот 29 июль куни жамоатчиликка ошкор қилинган.

Ҳозирча ZAMAN’нинг устав капитали, бошқарув таркиби, хизматлари ва фаолиятни бошлаш муддати очиқланмаган.

Маълумот учун, Ҳаёт Банкнинг 100 фоиз акциялари тадбиркор Ботир Раҳимовга тегишли.

Бу ҳали исломий банк очилди дегани эмас

Корпоратив қарорнинг қабул қилиниши янги банк фаолият бошлаганини англатмайди. Исломий микромолия банки банк операцияларини амалга ошириши учун Марказий банкдан дастлабки рухсат ва тегишли лицензия олиши керак.

Ўзбекистонда исломий банклар ва исломий микромолия банклари фаолиятининг ҳуқуқий асосларини белгиловчи қонун 2026 йил 29 июндан кучга кирган.

Марказий банк томонидан тегишли низомга киритилган ўзгартириш ва қўшимчаларга кўра, исломий банк фаолияти учун алоҳида лицензия берилади.

Ўзгаришлар оддий банклар билан бир қаторда исломий банклар ва исломий микромолия банкларини ташкил этиш, давлат рўйхатидан ўтказиш ҳамда уларга лицензия бериш тартибини ҳам белгилайди.

Хусусан, исломий банк ташкил этиш учун Марказий банкдан дастлабки рухсат олиш талаб этилади. Ариза берувчи одатий таъсис ҳужжатларидан ташқари исломий молия кенгаши, исломий молия бўйича махсус бўлинма ва ички аудит фаолиятини тартибга солувчи ҳужжатлар лойиҳасини тақдим этиши керак.

Шунингдек, банкда исломий молия стандартларига мувофиқлик сиёсати бўлиши ҳамда исломий молия кенгаши аъзолари Марказий банк билан келишилиши лозим.

Шу сабабли Ҳаёт Банк томонидан ZAMAN’ни ташкил этиш тўғрисида қарор қабул қилингани янги банк фаолият бошлаганини англатмайди. 

Ташкилот аввал Марказий банкнинг дастлабки рухсатини олиши, давлат рўйхатидан ўтиши ва исломий банк фаолиятини амалга ошириш ҳуқуқини берувчи лицензияга эга бўлиши керак.

Бундан аввал, Apex Moliya акциядорлари амалдаги микромолия ташкилотини исломий микромолия банкига айлантиришга қарор қилганди. Компания устав капиталини 50 млрд сўмга етказиш ҳамда Марказий банкдан рухсат ва лицензия олишни режалаштирган.

Шу тариқа, Ҳаёт Банк мавжуд ташкилотни банкка айлантирмоқчи бўлса, Ҳаёт Банк ZAMAN’ни алоҳида янги акциядорлик жамияти сифатида ташкил этмоқда.

Ўзбекистонда исломий микромолиялаштириш бозори ҳозирча катта эмас, бироқ тез ўсмоқда. Марказий банк маълумотларига кўра, микромолия ташкилотлари 2026 йилнинг биринчи чорагида 11,2 млрд сўмлик исломий молиялаштириш хизматларини кўрсатган. Бу 2025 йилнинг мос даврига нисбатан қарийб саккиз баробар кўп.