Fitch Ўзбекистон кредит рейтинги прогнозини “ижобий”га яхшилади
Fitch Ratings Ўзбекистоннинг суверен кредит рейтингини “BB” даражасида тасдиқлаб, прогнозни “барқарор”дан “ижобий”га ўзгартирди. Агентлик қарорни ислоҳотлар давом этаётгани, юқори иқтисодий ўсиш, паст давлат қарзи, бюджет тақчиллигининг назоратда сақланаётгани ва ташқи захиралар мустаҳкамлиги билан изоҳлаган.
Халқаро Fitch Ratings агентлиги Ўзбекистоннинг суверен кредит рейтинги бўйича прогнозини яхшилади. Агентлик мамлакатнинг узоқ муддатли хорижий валютадаги эмитент дефолт рейтингини “BB” даражасида сақлаб қолди, бироқ прогнозни “Stable”дан “Positive”га кўтарди.
Президент Администрацияси раҳбари Саида Мирзиёева мазкур қарорга муносабат билдириб, глобал беқарорлик ва молия бозорларидаги мавҳумлик шароитида Ўзбекистон Президент Шавкат Мирзиёев раҳбарлигида изчил ислоҳотларни давом эттираётганини таъкидлади.
“Бу халқаро инвесторлар томонидан мамлакатимизга билдирилган юксак ишонч белгисидир. Мамлакатимизнинг суверен кредит рейтингини ошириш бўйича ишчи гуруҳ раҳбари сифатида алоҳида таъкидламоқчиманки, биз ҳамкорларимиз билан фаол алоқаларни давом эттирамиз.
Стратегик мақсадимиз — 2030 йилга қадар юртимиз рейтингини “инвестициявий” даражага олиб чиқиш”, — дейди Саида Мирзиёева ўзининг Telegram каналида.
Fitch қарорини мамлакатнинг паст давлат қарзи, сезиларли ташқи захиралари ва юқори иқтисодий ўсиш салоҳияти билан изоҳлаган. Агентликка кўра, Ўзбекистоннинг амалдаги “BB” рейтинги айнан шу омиллар билан қўллаб-қувватланмоқда.
Fitch’га кўра, мамлакатда кенг қамровли ислоҳотлар дастури давом этмоқда. Улар бозор самарадорлигини ошириш, хусусийлаштиришни кенгайтириш, монетар сиёсат узатиш механизмини яхшилаш, фискал бошқарув ва шаффофликни кучайтиришга қаратилган. 2021–2025 йилларда Ўзбекистонда тахминан $5,1 млрдлик давлат активлари хусусийлаштирилган, шундан $1,6 млрд 2025 йилга тўғри келган.
Агентлик иқтисодий ўсиш бўйича ҳам ижобий прогноз билдирган. Fitch Ўзбекистон иқтисодиёти 2026 йилда 6 фоизга ўсишини, 2027–2028 йилларда эса ўсиш ўртача 6,4 фоиз атрофида бўлишини кутмоқда. Ўсишни ислоҳотлар самараси, хомашё бозоридаги талаб ва барқарор пул ўтказмалари қўллаб-қувватлаши қайд этилган.
Fitch бюджет тақчиллиги бўйича ҳам ижобий баҳо берган. 2025 йилда консолидациялашган бюджет тақчиллиги ЯИМга нисбатан 2,1 фоизни ташкил этган ва 3 фоизлик лимитдан паст бўлган. Агентлик ўрта муддатда тақчиллик ушбу лимит доирасида қолишини кутмоқда.
Давлат қарзи даражаси ҳам рейтингни қўллаб-қувватловчи асосий омиллардан бири сифатида кўрсатилган. Fitch прогнозига кўра, Ўзбекистон давлат қарзи ЯИМга нисбатан 2027–2028 йилларда 28 фоизгача пасаяди. Бу “BB” рейтингидаги давлатлар медианаси — тахминан 53 фоиздан анча паст.
Шунингдек, агентлик инфляция пасаяётганини қайд этган. 2026 йил апрелида йиллик инфляция 7 фоизни ташкил этган, бу 2025 йил апрелидаги 10,1 фоизлик кўрсаткичдан паст. Шу билан бирга, инфляция ҳали ҳам Марказий банкнинг ўрта муддатли 5 фоизлик мақсадидан юқори экани таъкидланган.
Ташқи захиралар ҳам Fitch баҳосида муҳим кучли томонлардан бири бўлиб қолмоқда. Агентлик Ўзбекистоннинг валюта захиралари 2025 йилдаги $66 млрддан $71 млрдгача ошишини прогноз қилмоқда. Захираларнинг қарийб 83 фоизи олтин ҳиссасига тўғри келади.
Банк сектори бўйича эса Fitch капитал етарлилиги юқори эканини қайд этган. 2025 йил якунида банк тизимининг умумий капитал етарлилик коэффициенти 18,3 фоизни ташкил этган. Шу билан бирга, хорижий валютадаги кредитлар улуши 2023 йил охиридаги 45 фоиздан 2025 йил якунида 39,2 фоизгача пасайган.
Аввалроқ, 2025 йил июнида Fitch Ўзбекистон рейтингини “BB-”дан “BB”га ошириб, прогнозни “барқарор” деб белгилаган эди. 2026 йил 3 июндаги янги қарор эса рейтингни ўзгартирмаган ҳолда, унинг келгуси йўналиши бўйича баҳони яхшилади.
