Эндиликда банк карталарини 14 ёшдан мустақил олишга рухсат берилади
Банк карталарининг чиқарилиши ва муомалада бўлиши қоидаларига ўзгартиришлар киритилди. Эндиликда 14 ёшдан 18 ёшгача бўлган вояга етмаганларга ҳам банк картаси очишга рухсат этилади. Шунингдек, янги ижтимоий ва бизнес карталари ҳам жорий этилади.
Марказий банк Ўзбекистонда банк карталарини чиқариш ва муомалага киритиш қоидаларига ўзгартиришлар киритишни тасдиқлади. Адлия вазирлиги бу қарорни 11 ноябрь куни рўйхатдан ўтказган.
МБ қарорига кўра, мамлакатда икки хил янги турдаги карталар жорий этилади. Ижтимоий карталар моддий ёрдам ва турли нафақаларни олиш учун эҳтиёжманд фуқароларга берилади. Бизнес карталар эса якка тартибдаги тадбиркорлар ҳамда ўзини ўзи банд қилган фуқаролар учун мўлжалланган бўлиб, улар орқали мижозлардан тўловларни қабул қилиш мумкин бўлади.
Эндиликда картани мустақил равишда расмийлаштириш 14 ёшдан бошлаб мумкин бўлади. 14 ёшгача бўлган болаларга эса карта ота-онасидан бири ёки қонуний вакилининг (васий ёки ҳомийнинг) ёзма розилиги асосида берилади.
Шунингдек, янги таҳрирдаги қоидаларга мувофиқ, тўлов тизимлари банк карталарини олдиндан эмиссия қилиш ҳуқуқига эга бўлади. Бундай ҳолларда карталарда эгасининг исми кўрсатилмайди, улар фойдаланувчини идентификация қилгандан кейин фаоллаштирилади. Бу эса карталарни тезроқ тарқатиш ва улардан фойдаланишни соддалаштириш имконини беради.
Бундан ташқари, корпоратив карталар эгалари энди ичимлик суви таъминоти ва канализация хизматлари учун тўловларни амалга ошира олади. Ушбу жараённи мобил иловалар орқали ёки тўғридан-тўғри жойида бажариш мумкин бўлади.
