Дунёнинг энг бадавлат кишилари бойлиги бир кунда $304 млрдга кўпайди
Бу Bloomberg миллиардерлар индекси тарихидаги энг юқори бир кунлик ўсиш ҳисобланади.
АҚШ Президенти Доналд Трампнинг чоршанба куни эълон қилган 90 кунлик божхона тарифлари танаффуси глобал молия бозорларига ижобий таъсир кўрсатди.
Ушбу баёнотдан сўнг фонд бозорлари кескин кўтарилиб, дунёнинг энг бой инсонлари атиги бир кун ичида умумий бойликларига 304 миллиард доллар қўшишди. Бу Bloomberg Миллиардерлар Индекси юритила бошлаганидан бери қайд этилган энг йирик кунлик бойлик ўсиши ҳисобланади.
Энг катта фойда кўрган шахс — Tesla компаниясининг бош директори Илон Маск бўлди. Унинг бойлиги бир кунда 36 миллиард долларга ошди, бунга компания акцияларининг 23 фоизга кўтарилиши сабаб бўлди.
Иккинчи ўринда эса Meta компаниясининг асосчиси Марк Цукерберг турибди — у 26 миллиард долларга бойиди. Учинчи ўринда эса Nvidia компанияси раҳбари Женсен Хуанг жой олди, унинг бойлиги 15,5 миллиард долларга ўсди.
Энг катта фоизли ўсишга эга бўлган миллиардер эса Carvana компанияси бош директори Эрнест Гарсия III бўлиб, унинг бойлиги 25 фоизга ошди.
Трампнинг баёноти АҚШ фонд биржаларига сезиларли даражада ижобий таъсир кўрсатди. Хусусан, Dow Jones индекси 2 997 пунктга ёки 7,87% га ошди. S&P 500 индекси 9,5% га, технологик компаниялар устунлик қиладиган Nasdaq индекси эса 12,2% га кўтарилиб, тарихий даражадаги сакрашни қайд этди.
