Bitcoin нархи илк маротаба $110 000 дан ошди

22 май кунги савдоларда Bitcoin нархи кескин ошиб, тарихда илк бор $112 000 чегарасига яқинлашди. Бу криптовалютанинг январь ойида қайд этилган $109 000 даражасидаги аввалги рекордидан ҳам юқоридир.

CoinDesk Bitcoin нархлари индексига кўра, савдо вақтида рақамли актив $111 875 гача кўтарилган. Хабар тайёрланаётган пайтда эса нарх $110 871 атрофида сақланиб турибди.

Bitcoin’нинг рекорд даражага кўтарилиши глобал иқтисодий шароитларнинг қулайлашуви билан изоҳланмоқда. Хусусан, АҚШ ва Хитой ўртасидаги савдо урушининг юмшаши, шунингдек Европа ва Осиёда фоиз ставкаларининг пасайтирилиши хавфли активларга, жумладан криптовалюталарга бўлган талабни кучайтирмоқда.

Bitcoin ортидан бошқа йирик криптовалюталар ҳам юқорилаб кетди. Ethereum, Solana, Dogecoin ва Cardano нархлари ҳам сўнгги кунларда сезиларли даражада ўсган.

Эслатиб ўтамиз, Pinkod 4 январь куни эълон қилинган мақолада таҳлилчилар 2025 йилда Bitcoin нархи $150 000–$200 000 оралиғигача етишини тахмин қилаётганини билдирган эди.