Беҳзод Хошимов Бизнесни ривожлантириш банки Кузатув кенгашига кирди
Беҳзод Хошимов “Бизнесни ривожлантириш банки” Кузатув кенгашининг мустақил аъзоси этиб сайланди. У билан бирга Ричард Огдон, Дэвид Найжел Клив ва Беҳруз Зиядуллаев ҳам кенгаш таркибига киритилди. Янгиланган тўққиз кишилик таркибда мустақил аъзолар сони бештага етди.
Иқтисодчи Беҳзод Хошимов “Бизнесни ривожлантириш банки” Кузатув кенгашининг мустақил аъзоси этиб сайланди. Банк кенгашининг тўққиз кишилик янги таркибида мустақил аъзолар сони тўрттадан бештага ошиб, улар кўпчиликни ташкил этадиган бўлди.
Банк акциядорларининг 3 сентябрь куни ўтказилган навбатдан ташқари умумий йиғилишида Кузатув кенгаши таркиби янгиланди. Нодирбек Хусанов, Мансурхўжа Юсупхўжаев, Энгин Акчакоджа ва Мантас Сукевичиус кенгаш таркибидан чиқарилди.
Уларнинг ўрнига Беҳзод Хошимов, Ричард Огдон, Дэвид Найжел Клив ва Иқтисодиёт ва молия вазирлиги бош мутахассиси Беҳруз Зиядуллаев сайланди. Кенгашнинг барча тўққиз аъзоси уч йиллик муддатга тасдиқланди.
Янги таркибда Илҳом Норқулов, Тимур Хусанов, Беҳруз Зиядуллаев ва Зумрат Ибрахимжанова давлат вакиллари сифатида фаолият юритади. Мустақил аъзолар эса Саидкамол Ходжаев, Беҳзод Хошимов, Бруно Балванера, Ричард Огдон ва Дэвид Кливдан иборат.
1993 йилда Тошкентда туғилган Беҳзод Хошимов Сингапурнинг Наньянг технология университетида амалий математика бўйича бакалавр даражасини олган. Кейинчалик Висконсин–Мэдисон университетида иқтисодиёт бўйича магистратура ва бизнес бўйича PhD дастурини тамомлаган.
2024 йилдан у Нью-Йорк университетининг Абу-Дабидаги кампусида бизнес, ташкилотлар ва жамият йўналиши бўйича ассистент-профессор бўлиб ишлайди. Унинг асосий тадқиқот йўналишлари тадбиркорлик ва венчур капиталига қаратилган.
Хошимов банк секторидаги корпоратив бошқарувга 2020 йилдан жалб қилинган ва шу вақтдан буён “Микрокредитбанк” Кузатув кенгаши аъзоси ҳисобланади. Bankers.uz маълумотига кўра, унинг ушбу банк кенгашидаги аъзолиги масаласи 18 сентябрда кўриб чиқилади ва у янги таркиб учун кўрсатилган номзодлар орасида йўқ.
Беҳзод Хошимов, Ричард Огдон ва Дэвид Клив Марказий банк билан келишилгандан сўнг “Бизнесни ривожлантириш банки” Кузатув кенгашидаги вазифаларини бажаришга киришади.
