Apple’дан OpenAI’гача: хорижий платформалар Ўзбекистонда қанча солиқ тўлади?
2026 йилнинг биринчи ярмида Ўзбекистонда электрон хизмат кўрсатувчи 97 та хорижий компания 143,8 млрд сўм солиқ тўлади. Бу ўтган йилнинг мос даврига нисбатан 84 фоизга кўп. Жами тушумнинг 66,6 фоизи Apple, Google ва Meta ҳиссасига тўғри келган.
Солиқ қўмитаси маълумотларига кўра, хорижий компаниялар январь–июнь ойларида Ўзбекистонда 1,2 трлн сўмлик электрон хизмат кўрсатган.
Таққослаш учун, 2025 йилнинг биринчи ярмида кўрсатилган хизматлар қиймати 656,9 млрд сўмни, тўланган солиқлар эса 78,2 млрд сўмни ташкил этганди.
Шу тариқа, бир йил ичида электрон хизматлар ҳажми 543,8 млрд сўм ёки 82,8 фоизга ошган. Солиқ тушумлари эса 65,6 млрд сўмга кўпайган.
Ўзбекистонда солиқ тўловчи сифатида рўйхатдан ўтган хорижий электрон хизмат кўрсатувчилар сони ҳам ошмоқда. Уларнинг сони 2025 йил бошида 63 та, 2026 йил бошида 78 та бўлган бўлса, 1 июль ҳолатига 97 тага етган.
Ярим йиллик якунлари бўйича энг кўп солиқ тўлаган компания Apple бўлди. Компания Ўзбекистонда 280,6 млрд сўмлик хизмат кўрсатиб, 33,6 млрд сўм солиқ тўлаган.
Google 277,6 млрд сўмлик электрон хизмат учун 33,3 млрд сўм солиқ тўлаган. Apple ва Google ўртасидаги фарқ 321,5 млн сўмни ташкил этган.
Учинчи ўринни Meta эгаллаган. Компаниянинг Ўзбекистонда кўрсатган хизматлари қиймати 242,4 млрд сўмга, тўлаган солиқлари эса қарийб 29 млрд сўмга етган.
Apple, Google ва Meta биргаликда 95,9 млрд сўм солиқ тўлаган. Бу хорижий электрон хизмат кўрсатувчилардан тушган жами солиқларнинг 66,7 фоизига тенг.
Тўртинчи ўриндаги Valve Corp. (стеам маркетплейси эгаси) Ўзбекистонда 132 млрд сўмлик хизмат кўрсатиб, 15,8 млрд сўм солиқ тўлаган.
Кейинги ўринларда сунъий интеллект хизматларини таклиф қилувчи Anthropic ва OpenAI жойлашган. Anthropic 53 млрд сўмлик хизмат учун 6,3 млрд сўм, OpenAI эса 46,8 млрд сўмлик хизмат учун 5,6 млрд сўм солиқ тўлаган.
Шунингдек, Midasbuy 3 млрд сўм, Booking.com 2,6 млрд сўм, TikTok 1,7 млрд сўм ва Anysphere 1,6 млрд сўм солиқ тўлаган.
Энг кўп солиқ тўлаган хорижий компаниялар:
- Apple — 33,6 млрд сўм;
- Google — 33,3 млрд сўм;
- Meta — 29 млрд сўм;
- Valve Corp. — 15,8 млрд сўм;
- Anthropic — 6,3 млрд сўм;
- OpenAI — 5,6 млрд сўм;
- Midasbuy — 3 млрд сўм;
- Booking.com — 2,6 млрд сўм;
- TikTok — 1,7 млрд сўм;
- Anysphere — 1,6 млрд сўм.
Дастлабки ўнта компания жами 132,5 млрд сўм солиқ тўлаган. Бу умумий тушумнинг 92,2 фоизини ташкил этади. Қолган 87 та компания ҳиссасига эса 11,3 млрд сўм ёки жами солиқнинг 7,8 фоизи тўғри келган.
Рейтингга сунъий интеллект хизматларини кўрсатувчи учта компания — Anthropic, OpenAI ва Anysphere кирган. Улар ярим йилда Ўзбекистонда жами 112,9 млрд сўмлик хизмат кўрсатиб, 13,5 млрд сўм солиқ тўлаган. Бу хорижий электрон хизматлардан тушган барча солиқларнинг 9,4 фоизига тенг.
