Apple MacBook ва iPad нархларини кескин оширди

Apple MacBook ҳамда iPad қурилмалари нархларини сезиларли даражада оширди. Компания бунга сунъий интеллект инфратузилмасига талаб ортиши ортидан хотира ва маълумот сақлаш чиплари қимматлашганини сабаб қилмоқда. Айрим компьютерлар бир кечада 500 долларгача қимматлашди.

Компания 25 июндан бошлаб АҚШдаги расмий онлайн дўконида Mac ва iPad қурилмаларининг янги нархларини жорий қилди.

Apple’нинг қайси қурилмалари қимматлашди?

Нарх ошиши фақат айрим MacBook ва iPad моделлари билан чекланмаган. Apple ноутбуклар, стол компьютерлари, планшетлар ва уй қурилмаларининг деярли барча асосий турларини қимматлаштирди.

Mac ва MacBook’лар

— MacBook Neo — 599 доллардан 699 долларга, 16,7 фоизга;

— 13 дюймли MacBook Air — 1 099 доллардан 1 299 долларга, 18,2 фоизга;

— 15 дюймли MacBook Air — 1 299 доллардан 1 499 долларга, 15,4 фоизга;

— M5 чипли MacBook Pro — 1 699 доллардан 1 999 долларга, 17,7 фоизга;

— M5 Pro чипли MacBook Pro — 2 199 доллардан 2 499 долларга, 13,6 фоизга;

— M5 Max чипли MacBook Pro — 3 599 доллардан 4 099 долларга, 13,9 фоизга;

— iMac — 1 299 доллардан 1 499 долларга, 15,4 фоизга;

— Mac mini — 599 доллардан 799 долларга, 33,4 фоизга;

— M4 Max чипли Mac Studio — 1 999 доллардан 2 499 долларга, 25 фоизга;

— M3 Ultra чипли Mac Studio — 3 999 доллардан 5 299 долларга, 32,5 фоизга қимматлашди.

Энг катта номинал ўсиш M3 Ultra чипли Mac Studio’да қайд этилди: унинг бошланғич нархи бирданига 1 300 долларга ошди.

iPad’лар

— базавий iPad — 349 доллардан 449 долларга, 28,7 фоизга;

— iPad mini — 499 доллардан 599 долларга, 20 фоизга;

— 11 дюймли iPad Air — 599 доллардан 749 долларга, 25 фоизга;

— 13 дюймли iPad Air — 749 доллардан 949 долларга, 26,7 фоизга;

— 11 дюймли iPad Pro — 999 доллардан 1 199 долларга, 20 фоизга;

— 13 дюймли iPad Pro — 1 299 доллардан 1 499 долларга, 15,4 фоизга қимматлашди.

Apple TV, HomePod ва Vision Pro

— HomePod — 299 доллардан 349 долларга, 16,7 фоизга;

— HomePod mini — 99 доллардан 129 долларга, 30,3 фоизга;

— 64 GB хотирали Apple TV 4K — 129 доллардан 199 долларга, 54,3 фоизга;

— 128 GB хотирали Apple TV 4K — 149 доллардан 249 долларга, 67,1 фоизга;

— 256 GB хотирали Vision Pro — 3 499 доллардан 3 699 долларга;

— 1 TB хотирали Vision Pro — 3 899 доллардан 4 199 долларга қимматлашди.

Қурилмаларнинг кучлироқ хотира ва маълумот сақлаш имкониятларига эга конфигурацияларида ўсиш янада катта. Масалан, энг юқори конфигурациядаги 16 дюймли MacBook Pro 7 199 доллардан 9 999 долларга, Mac mini 4 499 доллардан 6 199 долларга, Mac Studio эса 10 099 доллардан 14 299 долларга қимматлашди.

Ҳозирча iPhone, Apple Watch ва AirPods нархларига ўзгартириш киритилмаган.

Нархлар нега оширилди?

Apple қарорни тез суръатларда қимматлашаётган оператив хотира ва маълумот сақлаш чиплари билан изоҳлади.

Сунъий интеллект компаниялари йирик маълумотлар марказларини қураётгани сабабли серверлар учун хотира чипларига талаб кескин ошган. Ишлаб чиқарувчилар юқори даромад келтирадиган AI серверлари ва Nvidia каби компаниялар буюртмаларига устуворлик бермоқда. Натижада оддий ноутбук, планшет ва смартфонлар учун мўлжалланган чиплар таклифи қисқарган.

TrendForce ҳисоб-китобларига кўра, анъанавий DRAM хотира чиплари нархи 2026 йилнинг биринчи чорагида қарийб икки баравар ошган. Иккинчи чоракда эса нархларнинг яна 58–63 фоизга кўтарилиши кутилмоқда.

Apple шу пайтгача ошган харажатларнинг катта қисмини ўз зиммасига олганини, бироқ эндиликда аввалги нархларни сақлаб қолиш имконияти қолмаганини билдирди.

Нархларнинг оширилиши компания акцияларига ҳам босим ўтказди. Эълон ортидан Apple акциялари қарийб 5 фоизга пасайди.

Таҳлилчилар хотира чиплари билан боғлиқ харажатлар камаймаса, кузда тақдим этилиши кутилаётган янги iPhone моделлари ҳам қимматроқ нархда сотувга чиқарилиши мумкинлигини тахмин қилмоқда.

Мазкур нархлар АҚШдаги Apple Store учун белгиланган бўлиб, солиқларни ўз ичига олмайди. Ўзбекистондаги чакана нархлар етказиб бериш харажатлари, валюта курси ва сотувчилар устамасига қараб бундан юқорироқ бўлиши мумкин.