Anorbank акциядорлари таркибига хорижий инвестор кирди, асосий акциядор Олимов улуши икки баробарга қисқарди

Anorbank акциядорлари ва банкка аффилланган шахслар рўйхатида ўзгаришлар амалга оширилди. Унга кўра, банк акциядорлари таркибига Нидерландияда рўйхатдан ўтган Bekamin B.V. компанияси киритилди.

Маълум қилинишича, банкнинг асосий акциядори Қаҳрамонжон Олимовнинг улуши 99,38 фоиздан 49,38 фоизгача қисқарган. Натижада унинг эгалигидаги акциялар сони 795,1 миллион донадан 395,1 миллион донагача камайди. Қолган 400 миллион дона акция бошқа шахсларга ўтказилган.

Шу билан бирга, Bekamin B.V. 400 миллион дона акция эгаси сифатида Anorbank’нинг аффилланган шахслар рўйхатига киритилди. 

Банк таркибига хорижий инвестор қўшилгани Анорбанкнинг расмий саҳифасида эълон қилинди. Бироқ битим қиймати ошкор этилмади.

Банк хабарига кўра, Bekamin B.V. улушли инвестицияларни бошқариш ҳамда институционал инвесторлар билан ишлашга ихтисослашган компания ҳисобланади.

Anorbank раҳбариятининг таъкидлашича, хорижий инвесторни жалб қилиш банк тараққиётидаги муҳим босқичлардан биридир:

“Халқаро инвесторларни жалб қилиш ва мустақил экспертларнинг иштироки капитални мустаҳкамлаш, шаффофликни ошириш ҳамда мижозлар ва ҳамкорлар учун маҳсулот ва хизматларни фаол ривожлантиришга қўшимча имкониятлар яратади. Бу, шунингдек, халқаро ҳамжамиятнинг банк стратегиясига бўлган ишончини тасдиқлайди”, — дейилади банк баёнотида.

Аввалроқ, The Insider нашри Парижда Anorbank раҳбари ўғирлаб кетилгани ҳақидаги воқеа саҳналаштирилган бўлиши мумкинлиги ҳақида суриштирув эълон қилган эди.

Нашр даъвосига кўра, ушбу ишда саҳналаштириш элементлари мавжуд. The Insider ўтказган суриштирув натижаларига кўра, Олимов айблаётган шахслар билан дўстона алоқада бўлган ва “ўғирланган” деб кўрсатилган кунларда улар билан бемалол ёзишиб, қўнғироқлар қилган.

Шунингдек, воқеа атрофида йирик молиявий низолар ва эски ҳисоб-китоблар мавжудлиги ҳам аниқлангани қайд этилган.