Алоқабанкда Исломий молия кенгаши ташкил этилди
Алоқабанк акциядорлари исломий молия хизматларини йўлга қўйиш доирасида уч кишилик Исломий молия кенгашини ташкил этди. Кенгашга Ўзбекистон ва Покистондан мутахассислар уч йил муддатга сайланди. Улар Марказий банк билан келишилганидан кейин ваколатларини бошлайди.
Алоқабанк акциядорларининг 28 сентябрь куни бўлиб ўтган навбатдан ташқари умумий йиғилишида Исломий молия кенгаши тўғрисидаги низом тасдиқланди.
Кенгаш таркибига Имом Термизий халқаро илмий-тадқиқот маркази манбашунослик бўлими илмий ходими Хикматулла Абиев, Ўзбекистон мусулмонлари идораси Фатво маркази колл-марказ шўбаси етакчи мутахассиси Муҳаммаджон Ибрагимов ҳамда Покистондаги Жомиа Дорул Улум Карачи вице-президенти Муҳаммад Зубайр Усмоний сайланди.
Уларнинг ваколат муддати уч йил этиб белгиланган. Бироқ кенгаш аъзолари ҳали иш бошламайди, аввал уларнинг номзоди Марказий банк билан келишилиши керак. Алоқабанк бошқаруви раиси Каммуна Ирисбекова тегишли ҳужжатларни қарор қабул қилинган кундан бошлаб 10 иш куни ичида регуляторга тақдим этади.
Акциядорлар кенгаш аъзоларига тўланадиган ҳақнинг энг юқори миқдорини ҳам белгилади. Кенгаш раиси ойига кўпи билан 24 млн сўм, бошқа аъзоларнинг ҳар бири эса 18 млн сўмгача ҳақ олиши мумкин.
Шу тариқа, уч кишилик кенгаш учун тўловларнинг умумий юқори чегараси ойига 60 млн сўм ёки йилига 720 млн сўмни ташкил этади. Исломий молия кенгашининг ҳар бир аъзоси билан алоҳида фуқаролик-ҳуқуқий шартнома тузилади.
Исломий молия кенгашини ташкил этиш банкда исломий молия хизматларини йўлга қўйиш учун кўрилаётган чоралардан биридир. Йиғилишда Алоқабанкнинг “Исломий молия стандартларига мувофиқлик сиёсати” ҳам тасдиқланди ва банк уставига тегишли ўзгартиришлар киритилди.
Уставга кўра, банк фойдани тақсимлаш асосида мижозларни молиялаштириш ва инвестициявий омонатларни жалб қилиш, товарларни насияга сотиш, олдиндан тўлов орқали молиялаштириш, шерикчилик лойиҳаларида қатнашиш ҳамда мол-мулкни исломий ижарага беришни режалаштирмоқда.
Бироқ бу хизматлар ҳозирча ишга туширилгани йўқ. Алоқабанк аввал исломий банк фаолиятини амалга ошириш ҳуқуқини берувчи лицензияни олиш учун Марказий банкка ҳужжатларни тақдим этиши керак. Лицензия берилганидан кейин банк уставидаги ўзгаришлар ҳам регуляторда рўйхатдан ўтказилади.
