61 фоизлик ўсиш: суғурта компаниялари I ярим йилликда қанча соф фойда олди?
Ўзбекистондаги суғурта компанияларининг жами соф фойдаси 2026 йил биринчи ярим йиллигида 505,5 млрд сўмга етиб, бир йилда 61,3 фоизга ошди. APEX Insurance ва Euroasia Insurance биргаликда сектор умумий натижасининг ярмидан кўпини таъминлади. Айни пайтда, учта компания ярим йилликни жами 7,9 млрд сўм зарар билан якунлади.
Pinkod очиқланган молиявий ҳисоботлар асосида суғурта компанияларининг 2026 йил биринчи ярим йиллигидаги соф натижаларини ўрганиб чиқди.
Ҳисобот тақдим этган 37 та ташкилотнинг 34 таси жами 513,3 млрд сўм соф фойда олди. Зарар билан ишлаган учта компаниянинг умумий салбий натижаси 7,9 млрд сўмни ташкил этди. Натижада секторнинг жами соф фойдаси 505,5 млрд сўмга етди.
Бозордаги фойданинг катта қисми бир нечта йирик компания ҳиссасига тўғри келмоқда. Хусусан, APEX Insurance ва Euroasia Insurance биргаликда 259 млрд сўм фойда олган — бу сектор умумий натижасининг 51,2 фоизига тенг.
10 млрд сўмдан кўп фойда олганлар
| Компания | Соф фойда | Йиллик ўзгариш |
|---|---|---|
| APEX Insurance | 153,9 млрд сўм | +22,3% |
| Euroasia Insurance | 105,1 млрд сўм | +304,6% |
| Mosaic Insurance Group | 33,4 млрд сўм | +19,4% |
| “Ўзбекинвест” | 31,8 млрд сўм | +8,2% |
| TBC Sug‘urta | 20,5 млрд сўм | +1 617,2% |
| “Кафолат суғурта” | 15,9 млрд сўм | +32,9% |
| “Халқ Суғурта” | 15,4 млрд сўм | +154,7% |
| Gross суғурта | 14,7 млрд сўм | +110,8% |
| “Темирйўл-Суғурта” | 14,1 млрд сўм | +2 131,1% |
| “Кафил-Суғурта” | 14,1 млрд сўм | +52,3% |
| Neo Insurance | 13,8 млрд сўм | +2 781,3% |
| “Имкон-Суғурта” | 13,6 млрд сўм | +138,2% |
| SQB Insurance | 12,4 млрд сўм | +0,3% |
| “Ҳамкор Суғурта” | 11,3 млрд сўм | +68% |
APEX Insurance бозордаги етакчиликни сақлаб қолди. Компаниянинг 153,9 млрд сўмлик фойдаси сектор жами соф натижасининг 30,4 фоизига тенг.
Бироқ APEX’да суғурта хизматларидан олинган ялпи фойда 161,5 млрд сўмдан 154 млрд сўмга камайган. Соф фойданинг ўсишига молиявий фаолият даромадларининг 94,8 млрд сўмдан 195,8 млрд сўмга етгани сезиларли таъсир кўрсатган.
Энг катта мутлақ ўсиш Euroasia Insurance’да кузатилди. Компания фойдасини 79,1 млрд сўмга ошириб, 105,1 млрд сўмга етказган. Суғурта хизматларидан соф тушум 62,5 млрд сўмдан 144,1 млрд сўмга, асосий фаолият фойдаси эса 30,3 млрд сўмдан 106,7 млрд сўмга кўтарилган.
Euroasia Insurance, APEX Insurance, TBC Sug‘urta, “Темирйўл-Суғурта” ва Neo Insurance жами фойдадаги йиллик ўсишнинг қарийб 80 фоизини таъминлаган.
1 млрддан 10 млрд сўмгача фойда олганлар
| Компания | Соф фойда | Йиллик ўзгариш |
|---|---|---|
| My Insurance | 7,7 млрд сўм | −29% |
| Ўзбекистон қайта суғурта компанияси | 4,9 млрд сўм | — |
| Semurg Insurance | 4,7 млрд сўм | +1 361,7% |
| Infinity Insurance | 4,3 млрд сўм | +13,9% |
| Alfa Invest | 4 млрд сўм | +399,8% |
| Aria Sug‘urta | 3,7 млрд сўм | +66,5% |
| “Капитал Суғурта” | 3,3 млрд сўм | +255,2% |
| O‘zbekinvest Hayot | 2,3 млрд сўм | +34,3% |
| Kafolat Hayot Insurance | 1,9 млрд сўм | +198% |
| INSON | 1,5 млрд сўм | +147,5% |
| Apex Life Insurance | 1,2 млрд сўм | +934,9% |
| Quantum Insurance | 1,1 млрд сўм | −82,6% |
Ушбу гуруҳда Semurg Insurance энг катта нисбий ўсишни қайд этди. Айни пайтда, Quantum Insurance фойдаси 6,3 млрд сўмдан 1,1 млрд сўмга, My Insurance’ники эса 10,8 млрд сўмдан 7,7 млрд сўмга камайган.
1 млрд сўмдан кам фойда олганлар
| Компания | Соф фойда | Йиллик ўзгариш |
|---|---|---|
| Alfa Life Insurance | 774,7 млн сўм | −54,9% |
| IShONCh суғурта | 633,7 млн сўм | +7,8% |
| Impex-Insurance | 510,3 млн сўм | −87,3% |
| “Ўзагросуғурта” | 294,3 млн сўм | −91,6% |
| Trust Insurance | 247,2 млн сўм | −45,4% |
| “Фаровон Суғурта” | 225,1 млн сўм | зарардан фойдага |
| Agros Hayot | 67,9 млн сўм | −51% |
| Asia Insurance | 49,7 млн сўм | зарардан фойдага |
Asia Insurance 2025 йилнинг биринчи ярим йиллигидаги 10,4 млрд сўмлик зарардан 49,7 млн сўмлик фойдага чиққан. “Фаровон Суғурта” ҳам 584,9 млн сўмлик зарарни 225,1 млн сўмлик фойдага айлантирди.
Зарар билан якунлаганлар
| Компания | Соф натижа | Ўзгариш |
|---|---|---|
| Euroasia Life Insurance | −49,9 млн сўм | зарар 66,8% камайган |
| Alskom Sug‘urta | −2,2 млрд сўм | фойдадан зарарга |
| Prestige Insurance | −5,6 млрд сўм | фойдадан зарарга |
Энг катта зарар Prestige Insurance’да қайд этилди. Компанияда суғурта хизматлари таннархи тушумдан 1,4 млрд сўмга ошиб кетган, давр харажатлари эса 6,3 млрд сўмни ташкил қилган. Натижада асосий фаолиятдан 7,7 млрд сўм зарар юзага келган.
Alskom Sug‘urta’да давр харажатлари 14,2 млрд сўмдан 26,1 млрд сўмга ошган. Бошқа операцион даромадлар эса 34,8 млрд сўмдан 6,5 млрд сўмга тушиб, компаниянинг 13,5 млрд сўмлик фойдадан 2,2 млрд сўмлик зарарга ўтишига таъсир кўрсатган.
.png)
Изоҳ: йиллик ўзгаришлар компанияларнинг 2026 йилги ҳисоботларида қайта кўрсатилган 2025 йилнинг мос даври рақамлари асосида ҳисобланди. Айрим компаниялардаги қиёсий маълумотлар 2025 йилда дастлаб эълон қилинган ҳисоботлар билан фарқ қилади.
