2025 йилнинг I чорагида солиқ тушумлари 48 трлн сўмдан ошди

Ўзбекистонда 2025 йил I чоракдаги солиқ тушумлари миқдори 48,2 трлн сўмни ташкил этди. Бу ҳақда Солиқ қўмитаси хабар берди.

2025 йилнинг дастлабки чорагида солиқ тушумлари 2024 йилнинг мос даврига нисбатан сезиларли - 16,9 фоизлик ўсиш қайд этилди. Жумладан, фойда солиғи бўйича тушум 11,8 триллион сўмни ташкил этиб, 22 фоизга ошди. Қўшилган қиймат солиғи (ҚҚС) 9,8 триллион сўмга етиб, 17,1 фоизга кўпайди. Жисмоний шахслардан олинадиган даромад солиғи (ЖШОДС) 9,3 триллион сўмни ташкил этиб, 20,3 фоизлик ўсишга эришилди.

Акциз солиғи бўйича тушумлар 4,5 триллион сўмни ташкил қилиб, 31,2 фоизга ошган бўлса, ер қаъридан фойдаланганлик учун солиқ 4,3 триллион сўмни ташкил этиб, 25,2 фоизлик ўсишни кўрсатди. Сув ресурсларидан фойдаланганлик учун солиқ ва солиқсиз тушумлар 3,6 триллион сўмга етиб, 35 фоизлик ўсиш билан ажралиб турди.

Ер солиғи ва мол-мулк солиғи ҳар бири 2,1 триллион сўмни ташкил этиб, мос равишда 11,1% ва 21,1% ўсишга эга бўлди. Аҳолидан олинадиган солиқ (АОС) эса 0,7 триллион сўмни ташкил этиб, 18,4 фоизга кўпайди.