2025 йилда ўзбекистонлик истеъмолчиларга 1,5 трлн сўмдан ортиқ кешбек қайтарилди

2025 йил январь–декабрь ойларида Ўзбекистонда харид чеклари бўйича истеъмолчиларга жами 1 трлн 514 млрд сўм кешбек тўлаб берилди. Бу ҳақда Давлат солиқ қўмитаси маълум қилди.

Йил давомида 7,47 млн нафар фойдаланувчи Солиқ иловаси орқали кешбек хизматидан фойдаланган. Жами 1,606 млрд та фискал чек рўйхатга олинган. Декабрь ойининг ўзида эса 5,36 млн фойдаланувчига 137,4 млрд сўм кешбек ҳисобланган.

Ўртача бир чек суммаси 102,6 минг сўмдан 94,2 минг сўмгача камайган (–8,1%), ушбу чеклар бўйича ўртача 942 сўм кешбек қайтарилган. 

Ҳудудлар кесимида энг катта ҳажм Тошкент шаҳри ҳиссасига тўғри келиб, йил якунида 564 млрд сўмдан ортиқ кешбек тўланган. Кейинги ўринларда Тошкент вилояти (177,2 млрд сўм) ва Фарғона вилояти (129,3 млрд сўм) жой олган. Шу билан бирга, Самарқанд (103,6 млрд сўм), Хоразм (80 млрд сўм), Андижон (66,7 млрд сўм) ва Қорақалпоғистон (67 млрд сўм) ҳам юқори кўрсаткич қайд этган.

Энг кам кешбек тўланган ҳудудлар эса Сирдарё вилояти (19,3 млрд сўм), Жиззах вилояти (26,5 млрд сўм) ва Навоий вилояти (35 млрд сўм) бўлган. Шунингдек, Сурхондарё вилоятида 51,3 млрд сўм, Бухоро вилоятида 58,7 млрд сўм, Қашқадарё вилоятида 62,1 млрд сўм кешбек қайтарилган.