Chainalysis tadqiqot firmasining maʼlum qilishicha, Shimoliy Koreyaga aloqador xakerlar 1,3 milliard dollarlik raqamli valyutalarni oʻgʻirlagan. Bu oʻz navbatida mamlakat tomonidan oʻgʻirlangan oʻtgan yilgi hajmdan ikki barobar koʻpdir.

Baʼzi oʻgʻirliklar kripto va boshqa texnologiya kompaniyalariga kirib olish uchun oʻzini masofaviy IT xodimlari sifatida koʻrsatgan Shimoliy Koreya xakerlari bilan bogʻliq.

Mazkur statistikalar, AQSh prezidenti Donald Tramp oʻzidan oldingi prezident Jo Baydenga qaraganda kriptoga nisbatan doʻstona munosabatda boʻlishi kutilayotgani sababli bitkoin narxi ikki barobardan koʻproq oshgan davrga toʻgʻri keldi.

Umuman olganda, 2024 yilda xakerlar tomonidan oʻgʻirlangan kriptovalyutalar miqdori oʻtgan yilga nisbatan 21 foizga oshgan, ammo raqamlar 2021 va 2022 yillarda sodir etilgan kripto oʻgʻirliklarga nisbatan kamroqdir.

2024 yilda oʻgʻirlangan kriptolar miqdorining oʻsishi, kriptovalyuta bozorining tobora murakkablashib, rivojlanib borayotgan tahdid manzarasini bartaraf etish zarurligini koʻrsatmoqda.

Bu yil oʻgʻirlangan kriptoning aksariyati kripto-platformalardagi foydalanuvchilarning aktivlariga kirishni tekshirish uchun ishlatiladigan maxfiy kodlarning buzilishi bilan bogʻliq boʻlgan.

“Markazlashgan birjalar foydalanuvchilarning katta miqdordagi mablagʻlarini boshqarishini hisobga olsak, shaxsiy parollarning buzilishi oqibatlari juda jiddiy boʻlishi mumkin”, deya qoʻshimcha qilinadi tadqiqotda.

Bu yilgi eng jiddiy kiberjinoyatlardan biri bu yapon kriptovalyuta birjasi DMM Bitcoin’dan 300 million dollarlik bitkoin oʻgʻirlanishi va Hindistonda joylashgan kriptovalyuta birjasi VazirX’dan qariyb 235 million dollarlik kriptovalyutalar yoʻqolishi boʻldi.

AQSh hukumati Shimoliy Koreya rejimi xalqaro sanksiyalarni chetlab oʻtish va pul yigʻish uchun kriptovalyuta oʻgʻirlash va kiberjinoyatning boshqa shakllariga murojaat qilishini aytdi.

Oʻtgan hafta Sent-Luis’dagi federal sud 14 nafar Shimoliy koreyalikni AQSh kompaniyalaridan pul oʻgʻirlash va Pxenyan harbiy dasturlariga pul oʻtkazishga qaratilgan uzoq davom etgan jinoiy sxemaning bir qismi sifatida ayblov qoʻydi.

AQSh Davlat departamenti, shuningdek, taxmin qilinayotgan sxema haqida batafsil maʼlumot bera olgan har bir kishiga 5 million dollargacha mukofot taklif qilishini eʼlon qildi

Shimoliy Koreya Bitcoin’lar miqdori boʻyicha dunyoda uchinchi oʻrinni egalladi — The Times

Shimoliy koreyalik xakerlar 2024 yilda 1,3 milliard dollarlik kriptovalyutalarni oʻgʻirlagan — BBC