Telegram va TON (The Open Network) ekotizimining dastlabki foydalanuvchilaridan biri @crypto foydalanuvchi nomi uchun 25 million dollarlik taklif oldi. Bu haqda Telegram asoschisi Pavel Durov messenjerdagi postida maʼlum qildi.

Taʼkidlanishicha, ushbu nom 2023 yilda bor-yoʻgʻi 350 ming dollarga sotib olingan edi. 2,5 yil ichida username narxi 71 barobarga oʻsgan.

Nom egasi esa yaqinda oʻz pozitsiyasini aniq ifodaladi:

“Agar bu nomlar mendan tortib olinmasa, men ularning barchasini xohlayman” ,— degan u Durovning soʻzlariga koʻra.

@crypto shu tariqa joriy yildagi eng qimmat Telegram foydalanuvchi nomiga aylandi. Taqqoslash uchun, 2024 yilda eng yuqori bahoga sotilgan nom @news boʻlib, 5,8 million dollarga sotilgan edi. Undan keyingi oʻrinda esa 5,2 million dollarga sotilgan @auto nomi turadi.

Telegram foydalanuvchi nomlarining bu darajada qimmatlashishi bejiz emas. Har bir nom TON blokcheynida tokenlashtirilgan — yaʼni u noyob, takrorlanmas va toʻliq foydalanuvchiga tegishli. Bu tizim foydalanuvchilarga raqamli aktivlariga toʻliq egalik qilish huquqini beradi.

Pavel Durov bu holatni real egalik kuchini koʻrsatuvchi misol sifatida baholadi:

“Odamlarga oʻz raqamli aktivlariga bevosita egalik qilish imkoniyati berilganda, haqiqiy moʻʼjizalar sodir boʻladi. Telegram foydalanuvchilari — bu raqamli suverenlar. Ular oʻz shaxsiyati va aktivlariga doimiy va buzilmas huquqqa ega yagona yirik platformada faoliyat yuritishmoqda”, — deya taʼkidladi u.

Avvalroq Pinkod Snoop Dogg va Telegram hamkorligidagi yangi NFT kolleksiyasi atigi yarim soat ichida toʻliq sotilib ketdi.

Telegram foydalanuvchisi @crypto nomi uchun 25 million dollarlik sotuv taklifini oldi