2025 yil 11 fevralda qabul qilingan (OʻRQ-1026-son) qonun bilan ayrim qonun hujjatlariga oʻzgartirish va qoʻshimchalar kiritildi. Bu haqida Adliya vazirligining “Huquqiy axborot” Telegram kanali xabar berdi.

Ushbu qonun mikromoliya tashkilotlari va tijorat banklari oʻrtasidagi oʻzaro bogʻliqlikni kuchaytirishga xizmat qiladi. Shuningdek, mikromoliya tashkilotlariga qoʻshimcha moliyaviy resurslarni, jumladan, depozitlarni jalb etish imkoniyatini yaratadi.

Qonunga muvofiq, bank xizmatlarini belgilangan shartlar asosida koʻrsatish vakolatiga ega boʻlgan mikromoliya banki instituti joriy etiladi.

“Banklar va bank faoliyati toʻgʻrisida”gi qonunga kiritilgan oʻzgartirishlarga koʻra, quyidagi kredit tashkilotlari oʻz faoliyatini oʻzgartirishi mumkin:

Mikromoliya tashkiloti – mikromoliya banki faoliyatiga oʻtish imkoniyatiga ega.
Mikromoliya banki – bank faoliyatiga oʻzgarishi mumkin.
Tijorat banki – mikromoliya banki sifatida faoliyat yuritishi mumkin.
Mikromoliya banki – mikromoliya tashkiloti sifatida qayta tashkil etilishi mumkin.

Shuningdek, “Litsenziyalash, ruxsat berish va xabardor qilish tartib-taomillari toʻgʻrisida”gi qonunga kiritilgan qoʻshimchalarga koʻra, mikromoliya banki faoliyatini amalga oshirish huquqini beruvchi litsenziya Markaziy bank tomonidan beriladi.

Yangi kredit tashkiloti: mikromoliya banklarini tashkil etishga ruxsat berildi