YouTube’ning 2025 yildagi reklama daromadi rekord darajaga — $40,4 mlrdga yetdi. Bu haqda Business Insider xabar berdi.

Bu koʻrsatkich ilk bor Disney, NBC, Paramount va Warner Bros. kompaniyalarining $37,8 mlrdlik umumiy reklama daromadidan oshib ketgan.

Shuningdek, YouTube’ning umumiy daromadi qariyb $62 mlrdni tashkil etdi. The Hollywood Reporter maʼlumotiga koʻra, bu hatto Disneyʼning media-boʻlinmasi daromadi ($60,9 mlrd)dan ham yuqori.

Tahlilchilar YouTube’ni “media bozorining yangi qiroli” deb atamoqda. Ularning baholashicha, platformaning qiymati $500–560 mlrd atrofida boʻlib, bu koʻplab anʼanaviy media kompaniyalaridan ancha yuqori. Eng yaqin raqobatchi sifatida Netflix koʻrsatilmoqda — uning bozor kapitallashuvi $409 mlrdni tashkil etadi.

Moffett Natanson prognozlariga koʻra, YouTube’ning keyingi oʻsishi platformaning global videoxosting sifatidagi yetakchi mavqei hamda sunʼiy intellektga kiritilayotgan investitsiyalar bilan bogʻliq boʻladi.

Nielsen maʼlumotlariga koʻra, 2026 yil yanvarida YouTube AQSh telekoʻrish bozorining 12,5% ulushini egallab, barcha striming va televideniye platformalarini ortda qoldirdi.

Platformaning tez oʻsishi asosan kreatorlar ekotizimi va obuna xizmatlari kengayishi bilan izohlanadi. 2021–2025 yillar oraligʻida YouTube kontent yaratuvchilarga $100 mlrd dan ortiq mablagʻ toʻlagan. Shuningdek, kompaniya daromadining qariyb uchdan bir qismi YouTube TV va boshqa premium xizmatlar hisobiga shakllanmoqda.

YouTube reklama daromadi $40,4 mlrdga yetib, anʼanaviy mediadan oʻzib ketdi