Forbes jurnali har yili eʼlon qiladigan dunyoning eng boy insonlari roʻyxatida bu yil oʻzgarish kuzatildi. Oʻzbekiston uchun ayniqsa ahamiyatli boʻlgan yangilik shundaki, Alisher Usmonov ilk bor ushbu roʻyxatda Oʻzbekiston vakili sifatida qayd etildi.

USM Holdings asoschisi boʻlgan Alisher Usmonov avvalgi yillarda Rossiya vakili sifatida koʻrsatilgan edi. Biroq, endilikda Forbes uni rasmiy ravishda Oʻzbekiston tadbirkori sifatida eʼtirof etdi. Uning boyligi oʻtgan yilga nisbatan $3,3 milliardga ortib, hozirda $16,7 milliardni tashkil etmoqda. Shuningdek, Usmonov jahon reytingida 144-oʻrindan 125-oʻringa koʻtarildi.

Alisher Usmonov 2022 yildan beri Toshkentda yashayotgani sababli Forbes uni Oʻzbekiston tadbirkori sifatida eʼtirof etgan boʻlishi mumkin.

Alisher Usmonov Oʻzbekistonning eng nufuzli tadbirkorlaridan biri boʻlib, 1953 yil 9 sentabrda Namangan viloyatida tugʻilgan. U Moskvadagi Xalqaro munosabatlar institutini tamomlagan va faoliyatini sanoat tarmoqlarida boshlagan. Dastlab, u plastik paketlar ishlab chiqarish orqali dastlabki kapitalini toʻplagan. Sobiq Sovet Ittifoqida bunday mahsulotlar juda kamyob boʻlgani sababli odamlar ularni yuvib, qayta ishlatishgan.

Usmonov keyinchalik metallurgiya, telekommunikatsiya va IT sohalariga sarmoya kiritib, dunyoning eng muvaffaqiyatli biznesmenlaridan biriga aylandi. Uning eng katta aktivlaridan biri Metalloinvest kompaniyasidagi ulushidir. Shuningdek, u Xiaomi va boshqa telekommunikatsiya, togʻ-kon sanoati va media kompaniyalarida ham ulushga ega.

Usmonov 2000 yildan 2014 yilgacha Rossiyaning davlatga qarashli Gazprom kompaniyasining Gazprom Investholding shoʻba korxonasiga rahbarlik qilgan. U, shuningdek, Facebook’ning dastlabki investorlaridan biri hisoblanadi.

Sport sohasida ham faol boʻlgan Usmonov sobiq qilichboz boʻlib, 2022 yilgacha Xalqaro qilichbozlik federatsiyasi prezidenti lavozimida ishlagan.

Alisher Usmonov Forbes milliarderlar reytingida Oʻzbekiston vakili sifatida qayd etildi