Soʻnggi paytlarda Bitcoin haqida gap ketganda, koʻpchilik uning narxi qanday qilib barqaror saqlanib turganiga eʼtibor qaratmoqda. Investopedia bu haqda maqola eʼlon qildi.

Oldinlari narxi bir kunda keskin oʻzgarib turadigan bu kriptovalyuta, bugun hatto dunyodagi geosiyosiy notinchliklar fonida ham oʻzini juda yaxshi ushlab turibdi va narxlar $74,000 hamda $76,000 oraligʻida tebranmoqda.

Xoʻsh, Bitcoin bozorida aslida nimalar yuz beryapti?

Bitcoin endi shunchaki tavakkal qilinadigan "oʻyinchoq" emas. U oltin yoki yirik aksiyalar (masalan, S&P 500) kabi ishonchli sarmoya vositasiga aylanib bormoqda. Bunga asosiy sabab — yirik sarmoyadorlarning bozordagi harakatidir. Moliya tilida "olmos qoʻllar" deb ataluvchi bu investorlar qiyin kunlarda ham vahimaga tushib oʻz Bitcoin’larini sotib yuborishmayapti. Bu esa bozorga qoʻshimcha barqarorlik taqdim etmoqda.

Unda nega narx tez oʻsmayapti?

Buning asosiy sababi AQShdagi qonunchilik muammolaridir. Hukumat kriptovalyutalarni tartibga soluvchi yangi qonunlarni (masalan, Clarity Act) qabul qilishda oʻta sekin harakat qilyapti. Aniq qoidalar yoʻqligi sababli, koʻplab yangi investorlar va yirik kompaniyalar bu bozorga katta pullar kiritishga ikkilanib turishibdi.

Mutaxassislar nima deydi: $56,000 mi yoki $165,000?

Mashhur “Citi Research” tahlil kompaniyasi hukumatning sekin harakatlarini hisobga olib, Bitcoin’ning yil oxiridagi kutilayotgan narxini $143,000 dan $112,000 ga tushirdi. Ularning tahlillariga koʻra, bozorning kelajagi uchun 3 ta asosiy ssenariy mavjud:

Kutish davri: Yangi qonunlar chiqquncha narx $70,000 atrofida aylanib turadi.
Eng yaxshi holat (Buqa bozori): Agar hukumat kriptovalyutalarga yashil chiroq yoqsa va qonunlar tasdiqlansa, narx osmonga sapchib, $165,000 gacha yetishi mumkin!
Eng yomon holat (Ayiq bozori): Agar dunyoda jiddiy iqtisodiy inqiroz yuz bersa, narx $56,000 gacha tushib ke atish ehtimoli bor.

Bitcoin oʻzining yovvoyi va keskin oʻsish davridan oʻtib, jiddiyroq aktivga aylanmoqda. Endigi katta sakrashlar va rekordlar bevosita hukumat qabul qiladigan qarorlarga bogʻliq boʻlib qolmoqda.

Bitcoin narxi 25% ga tushib ketishi yoki 120% ga oʻsishi mumkin — Investopedia