ANORBANK aksiyadori Qahramonjon Olimov unga nisbatan qoʻyilgan ayblovlar va 2025 yilda Parijda yuz bergan voqealar boʻyicha ilk bor batafsil bayonot berdi. Bayonot 16 oktabr kuni Olimovning Fransiyadagi advokatlari — FEDIDA ASSOCIES nomidan eʼlon qilindi.

Olimovning aytishicha, u 2025 yil 24 iyun kuni Parijda oʻgʻirlab ketilgan, ikki kun tutqunlikda saqlanib, qiynoqqa solingan va ozod qilinishi uchun pul toʻlashga majburlangan.

“Soʻnggi bir yarim yil davomida men va oilam bir qator hujumlarga uchrab keldik va men buni jinoiy hamda noqonuniy holat deb hisoblayman. Men ushbu bayonotni notoʻgʻri axborotni toʻgʻrilash hamda mazkur voqealar yuzasidan haqqoniy maʼlumot berish maqsadida taqdim etmoqdaman”, — deydi tadbirkor.

U Fransiya politsiyasi olib borgan tergov natijasida besh kishi hibsga olinib, sudgacha qamoqda saqlanayotganini bildirdi. Yana ikki shaxs sud nazoratiga olingan. Olimov gumonlanuvchilarni garov evaziga ozod qilish haqidagi iltimosnomalar ham rad etilganini maʼlum qildi.

Mazkur maʼlumotlar Olimovning bayonotida keltirilgan boʻlib, Fransiya huquqni muhofaza qiluvchi organlarining ochiq xabari bilan hozircha tasdiqlanmagan.

“Oʻzim odam oʻgʻirlash jinoyati qurboni boʻlganimga qaramay, Oʻzbekiston tomonidan odam oʻgʻirlashda ayblanib, Interpolning qizil bildirishnomasi orqali xalqaro qidiruvga berilganim bemaʼnilik”, — dedi Olimov.

U oʻziga qoʻyilgan ayblovlarni “toʻqima” deb atab, ularga qarshi sudda kurashayotganini bildirdi. Shuningdek, uning nomiga chiqarilgan qizil bildirishnoma Interpol saytidan olib tashlanganini maʼlum qildi.

Oʻzi nimalar boʻldi?

Sentabr oyi oxirida Interpol saytida Olimovga oid qizil bildirishnoma joylashtirilgan, biroq ochiq kartochkada qidiruv sababi koʻrsatilmagan edi. Keyinchalik mazkur sahifa tashkilot saytidan yoʻqoldi.

Avvalroq The Insider nashri manbalariga tayanib, Oʻzbekiston sudi Olimovni sirtdan hibsga olish haqida qaror chiqargani va xalqaro qidiruvga berganini yozgan edi. Nashr Parijdagi oʻgʻirlash voqeasi sahnalashtirilgan boʻlishi mumkinligini ilgari surgan. Olimov esa bu daʼvolarni qatʼiyan rad etmoqda.

Qahramonjon Olimov ANORBANK aksiyalarining 49,4 foiziga egalik qiladi. U 2 oktabr kuni bank Kuzatuv kengashi tarkibidan chiqish uchun ariza bergan, biroq masala 28 oktabrdagi aksiyadorlar yigʻilishida koʻrib chiqiladi. Shu vaqtgacha u rasman Kuzatuv kengashi aʼzosi boʻlib qoladi.

ANORBANK aksiyalarining 50 foizi Niderlandiyada roʻyxatdan oʻtgan Bekamin B.V. kompaniyasiga, qolgan 0,6 foizi esa “Kapital sugʻurta” AJga tegishli.

Markaziy bank avvalroq alohida aksiyador bilan bogʻliq vaziyat ANORBANKning joriy operatsion faoliyati va moliyaviy barqarorligiga bevosita taʼsir koʻrsatmasligini bildirgan. 2026 yil 1 sentabr holatiga bank aktivlari 21,4 trln soʻmni, majburiyatlari esa 19,8 trln soʻmni tashkil etgan.

“Oʻgʻirlash qurboni aslida menman” — Qahramonjon Olimov oʻziga nisbatan ayblovlarni rad etdi

Fransiya Apple’ni 150 mln yevro jarimaga tortdi