Tim Kuk qariyb 15 yil davomida Apple bosh direktori boʻlib ishlagach, lavozimidan ketmoqda. U 1 sentabrgacha bosh direktor sifatida ishlashda davom etadi. Shundan keyin kompaniya rahbarligini Apple’ning apparat muhandisligi boʻyicha katta vitse-prezidenti Jon Ternus qabul qilib oladi.

Biroq Kuk Appleʼni butunlay tark etmaydi. Kompaniya maʼlum qilishicha, u direktorlar kengashiga oʻtadi va u yerda ijrochi rais sifatida faoliyat yuritadi. Shunday boʻlsa-da, uning bosh direktorlik davrining yakunlanishi Apple tarixida muhim bir davr tugayotganini anglatadi.

Tim Kuk Apple bosh direktori lavozimini 2011 yil 24 avgust kuni egallagan. U kompaniya asoschilaridan biri va uning eng mashhur rahbarlaridan boʻlgan Stiv Jobs oʻrnini bosgan edi. Jobs esa bundan ikki oy oʻtib vafot etgan.

Kuk boshqaruvi davrida Apple juda katta oʻsishga erishdi. U kompaniyaning taʼminot zanjiri tizimini samarali tashkil qilgani bilan ham tanilgan. Shu yillar davomida Apple iPhone liniyasini takomillashtirdi va iPhone 5 modelidan keyingi smartfon avlodlarini ishlab chiqdi. Shuningdek, kompaniya yangi qurilmalarni ham taqdim etdi, jumladan Apple Watch aqlli soati va HomePod aqlli kolonkasi.

Bundan tashqari, Apple turli raqamli xizmatlarni ham ishga tushirdi. Ular orasida Apple Music musiqiy platformasi, Apple TV+ video servisi va Apple Fitness+ fitnes xizmati bor.

Kuk rahbarligida kompaniya tarixiy moliyaviy natijalarga erishdi. 2018 yilda Apple bozor qiymati 1 trillion dollarga yetgan AQShdagi birinchi kompaniyaga aylandi. 2022 yilda esa uning bozor kapitallashuvi 3 trillion dollardan oshdi. Oʻtgan yilning oktabr oyida Apple qiymati 4 trillion dollarga yetdi. Bu kompaniyaning 50 yillik yubileyidan (1 aprel) yarim yil oldin sodir boʻldi.

“Men Apple’ni butun borligʻim bilan sevaman va mijozlarimiz hayotini boyitish hamda dunyodagi eng yaxshi mahsulot va xizmatlarni yaratishga bagʻishlangan nihoyatda iqtidorli, innovatsion, ijodkor va gʻamxoʻr jamoa bilan ishlash imkoniga ega boʻlganim uchun juda minnatdorman”, — deydi Tim Kuk.

Sentabr oyida Apple bosh direktori boʻladigan Jon Ternus esa kompaniyada uzoq yillardan beri ishlaydi. U muhandis boʻlib, 2001 yilda Appleʼga qoʻshilgan. 2013 yilda apparat muhandisligi boʻyicha vitse-prezident boʻlgan, 2021 yilda esa katta vitse-prezident lavozimiga koʻtarilgan.

Kompaniya maʼlumotiga koʻra, Ternus iPad va AirPods kabi mahsulotlarning taqdim etilishida muhim rol oʻynagan. Shuningdek, u Apple’ning asosiy qurilma liniyalarini boshqarib kelgan va yaqinda chiqarilgan MacBook Neo modeligacha boʻlgan mahsulotlar ustida ishlagan.

Tim Kuk 15 yillik boshqaruvdan soʻng Apple bosh direktori lavozimidan ketadi

Tim Kuk Appleʼdagi CEO lavozimidan ketishi mumkin