Telegram NFT stikerlar bozoridagi umumiy savdo hajmi qariyb $10 mlnga yetdi. Bu haqda Inside Bitcoin nashri xabar berdi.

Telegram stikerlari NFT (nofungible token) loyihalari orasida foydalanuvchilarni jalb qilish va jamoalarni shakllantirishning yangi usuli sifatida keng ommalashmoqda.

Stikerlarga boʻlgan qiziqish Telegramʼdagi stikerlardan keng foydalanish va platformaning yaqinda TON blokcheyni bilan integratsiyalashuvi orqali NFT yaratishga imkon berishi bilan bogʻliq.

Joriy yil boshida taqdim etilgan Telegram NFT stikerlari bu raqamli stikerlar boʻlib, ular “nofungible token” sifatida tokenlashtirilgan, yaʼni har bir stiker yagona boʻlib, unga egalik qilinishi, savdo qilinishi va boshqa NFT bozorlarda sotilishi mumkin. NFT’lar oddiy raqamli tasvirlardan farqli oʻlaroq, noyob raqamli aktivga egalikni isbotlovchi vosita hisoblanadi.

NFT kompaniyalari stikerlar orqali millionlab daromad olmoqda

NFT stikerlar gʻoyasi hali nisbatan yangi boʻlishiga qaramay, baʼzi NFT loyihalari stikerlarni tokenlashtirib sotish orqali katta daromad topmoqda. Bu ayniqsa oʻyin va xabar almashish ilovalari sohasida yaqqol koʻzga tashlanadi — bu yerda NFT stikerlar kolleksiya uchun yangi oʻlcham va raqamli yaratuvchilar hamda jamoalar uchun monetizatsiya imkoniyatlarini ochib bermoqda.

Koʻplab NFT loyihalari TON blokcheyni asosida oʻz NFT stiker kolleksiyasini ishga tushirmoqda. Yaqinda, mashhur Yuga Labs kompaniyasi 5,555 ta NFT stikerlardan iborat cheklangan kolleksiyani taqdim etdi. Kompaniya 5,555 dona stikerdan iborat NFT kolleksiyasini chiqardi va ushbu stikerlar orqali taxminan 500 ming dollarlik savdo amalga oshirildi.

Bundan tashqari, koʻpchilikka tap to earn loyihasi orqali tanish boʻlgan Dogs stikerlari qariyb 1,9 mlnlik savdo hajmini koʻrsatgan.

Shuningdek, Doodles nomi bilan tanilgan mashhur NFT kolleksiyasining mualliflari ham 18 iyun kuni TON blokcheyni asosida 3,333 ta stikerdan iborat NFT kolleksiyasini chiqardi. Dune.com saytiga koʻra, ushbu Doodles NFT loyihasi stiker sotuvidan 490,618 dollar daromad olgan.

Qayd etish joizki, mazkur kolleksiyalar 24 soatdan kamroq vaqt ichida toʻliq sotib boʻlingan.

Telegram foydalanuvchilari NFT stikerlar xaridiga qariyb $10 million sarfladi