Meta kompaniyasi akkauntlarni tiklash va firibgarlarga qarshi kurashish uchun yuzni tanish tizimini Facebook va Instagram’ga qaytaradi.

2021 yil noyabr oyida Facebook foydalanuvchilarning tanqidi tufayli yuzni tanish tizimidan voz kechgandi. U suratga joylashtirishdan oldin unga odamlarni belgilashni taklif qiladi, shuningdek, ular aks etgan suratlar haqida bildirishnomalar yuboradi.

Foydalanuvchilar tizim ijtimoiy tarmoqqa oʻzlarining biometrik maʼlumotlarini toʻplash va saqlash imkonini beradi, deb hisoblashgan. Qayd etilishicha, endi kompaniya tizimni yana qaytarmoqda — lekin u turli funksiyalarga ega boʻladi.

U Facebook va Instagram’dagi akkauntlarni tiklash uchun ishlatiladi. Bunda foydalanuvchi qisqa video selfi yuboradi va tizim uni profil fotosuratlari bilan moslashtiradi. Agar yuz tasvirlari mos kelsa, foydalanuvchi hisobga kirish huquqiga ega boʻladi.

Bundan tashqari, funksiya akkaunt buzib kirilganiga shubha tugʻilsa, profil maʼlumotlarini oʻgʻirlagan firibgarlarning unga kirishiga yoʻl qoʻymaslik uchun ham qoʻllaniladi. Funksiya hozircha faqat sinovdan oʻtkazilmoqda.

Funksiyadan ikkinchi foydalanish holati esa firibgarlarga qarshi kurash hisoblanadi.

Tizim reklamani tekshiradi va agar unda “oʻlja” sifatida mashhur odamning surati borligiga shubha qilsa, uni haqiqiy fotosuratlari bilan taqqoslaydi. Agar moslik tasdiqlansa, reklama firibgarlik sifatida bloklanadi.

Bu xususiyat mashhurlar va jamoat arboblarining kichik roʻyxati uchun ham sinovdan oʻtkazilmoqda, ammo “yaqin haftalarda” koʻproq mashhur odamlar qoʻshiladi. Agar xohlasalar, ular bunday “himoya”dan ham voz kechishlari mumkin.

Meta kompaniyasi Facebook va Instagram’ga yuzni tanish tizimini qaytaradi